Prokuroria e Pejës jep detaje mbi ndërhyrjet institucionale para vrasjes së Arlinda Zekajt

Prokuroria Themelore në Pejë ka dalë sërish me sqarime për veprimet e institucioneve para dhe pas vrasjes së Arlinda Zekajt, duke trajtuar kërkesën e saj për zbatimin e një vendimi gjyqësor dhe rastet e mëhershme të raportuara prej saj.

Sipas komunikatës së Prokurorisë, më 22 tetor, Kryeprokurorja e këtij institucioni kishte pranuar një kërkesë nga Zekaj, e cila tashmë ka ndërruar jetë. Në kërkesë, ajo kishte shprehur shqetësim për mënyrën se si ishin trajtuar rastet e mëparshme dhe kishte kërkuar zbatimin e një urdhri të gjykatës.

Pas shqyrtimit të rrethanave, Kryeprokurorja e kishte përcjellë çështjen te institucionet kompetente, përfshirë Policinë e Kosovës, Gjykatën Themelore në Pejë, Drejtorinë për Punë dhe Mirëqenie Sociale, Qendrën për Punë Sociale dhe Zyrën për Mbrojtje dhe Ndihmë Viktimave.

Paralelisht, ishte hapur një rast për verifikimin e pretendimeve të Zekajt. Hetimi synonte të përcaktonte nëse veprimet ose mosveprimet e zyrtarëve të përmendur prej saj përbënin elemente të veprës penale të keqpërdorimit të pozitës apo autoritetit zyrtar.

Prokuroria ka bërë të ditur se më 16 tetor 2026, Gjykata kishte vendosur që ish-bashkëshorti i Zekajt ta lejonte atë të kthehej në shtëpinë e përbashkët dhe ta përdorte atë. Në të njëjtën kohë, gjykata kishte lëshuar edhe një urdhër mbrojtjeje me kohëzgjatje prej gjashtë muajsh, i cili kishte hyrë menjëherë në fuqi.

Institucioni ka sqaruar se, në bazë të vendimit gjyqësor, përgjegjësia për zbatimin e urdhrit dhe për informimin e Gjykatës në rast të zbatimit ose të ndonjë pengese i takonte Policisë së Kosovës.

Kur Zekaj kishte kërkuar zbatimin e urdhrit dhe rikthimin në banesën e përbashkët, Policia e Kosovës e kishte informuar prokurorin kujdestar për situatën.

Pas analizimit të rrethanave dhe rrezikut të mundshëm, prokurori kishte vlerësuar se kthimi i menjëhershëm i saj në shtëpi mund të cenonte jetën dhe sigurinë e saj. Për këtë arsye, ishin kontaktuar vëllezërit e Zekajt dhe ishte kërkuar që ajo të qëndronte përkohësisht te familjarët.

Edhe pse Zekaj kishte insistuar të kthehej në shtëpinë e përbashkët, prokurori i shtetit, duke u bazuar në rrezikun e vlerësuar, kishte udhëzuar që ajo të dërgohej në shtëpinë e vëllezërve të saj.

Me kërkesë të Zekajt, ishte hartuar edhe një shkresë zyrtare ku shpjegoheshin arsyet e vendimit për qëndrimin e saj te familjarët. Ajo kishte pranuar të shkonte atje, por kishte kërkuar që ditën e ardhshme të shoqërohej nga policia për t’u kthyer në shtëpinë e përbashkët.

Pas vlerësimit të rrezikut, prokurori i rastit dhe hetuesit policorë kishin vendosur që një patrullë të qëndronte pranë shtëpisë gjatë kthimit të planifikuar të saj.

Prokuroria ka njoftuar se dje, në orën 19:48, Policia e Kosovës e kishte lajmëruar prokurorin kujdestar për një rast të dyshuar të dhunës në familje në shtëpinë e Zekajt.

Në stacionin policor ishin dërguar Zekaj dhe ish-bashkëshorti i saj, J.S. Për rastin ishte nisur procedurë për veprën penale të mospërfilljes së gjykatës, ndërsa J.S. ishte ndaluar për 48 orë.

Gjatë trajtimit të rastit, Zekajt i ishte ofruar mundësia për t’u sistemuar në një strehimore. Megjithatë, ajo e kishte refuzuar këtë mundësi dhe kishte kërkuar të kthehej në banesën e përbashkët, ku ndodheshin djali dhe pasuria e saj.

Rreth orës 21:00, ajo ishte shoqëruar nga një patrullë policore drejt shtëpisë.

Vetëm pak minuta pas mbërritjes së saj, prokurori kujdestar ishte informuar se Zekaj ishte goditur me një mjet të fortë brenda shtëpisë. Për ngjarjen dyshohej kunati i saj, A.S.

Pas marrjes së njoftimit, në vendin e ngjarjes kishin shkuar njësitë përkatëse të Policisë së Kosovës, Kryeprokurorja e Prokurorisë Themelore në Pejë dhe prokurorja kujdestare e Departamentit për Krime të Rënda. Ato kishin ndjekur situatën dhe kishin ndërmarrë veprimet e para hetimore.

Ndërkohë, më 23 tetor, Prokuroria kishte ngritur aktakuzë ndaj ish-bashkëshortit të Zekajt, J.S., për veprën penale të kanosjes në kuadër të marrëdhënies familjare.

Prokuroria Themelore në Pejë ka deklaruar se pretendimet e ngritura nga Zekaj ishin marrë seriozisht dhe se ishin ndërmarrë hapa për t’i përcjellë ato te institucionet përkatëse, si dhe për të hetuar përgjegjësinë e mundshme të zyrtarëve të përmendur.

Institucioni ka shprehur keqardhje të thellë për vdekjen tragjike të Arlinda Zekajt dhe u ka përcjellë ngushëllime të sinqerta familjarëve të saj.

Po ashtu, Prokuroria ka kërkuar që rasti të hetohet në tërësi, në mënyrë objektive dhe profesionale, me synim sqarimin e të gjitha rrethanave dhe përcaktimin e përgjegjësive eventuale të personave të përfshirë.

Sipas Prokurorisë, Policia e Kosovës vazhdon veprimet për gjetjen dhe arrestimin e të dyshuarit A.S., i cili ende nuk është arrestuar.