Policia sqaron incidentet e mbrëmshme gjatë protestës pranë bazës së EULEX-it

Një grup protestuesish ka hedhur objekte të forta dhe mjete piroteknike në drejtim të bazës së EULEX-it, në rrugën Prishtinë–Fushë Kosovë, gjatë orëve të vona të së mërkurës, ka njoftuar Policia e Kosovës.

Forcat e rendit bënë të ditur se rreth orës 22:30, disa nga protestuesit që ndodheshin pranë objektit të Qeverisë u nisën drejt bazës së EULEX-it, e vendosur afër tregut të gjelbër.

Me të mbërritur te hyrja e objektit, protestuesit penguan qarkullimin në rrugë dhe nisën të hidhnin sende të ndryshme, objekte të forta dhe mjete piroteknike. Këto hollësi u dhanë në një njoftim të Policisë të publikuar pas mesnatës.

Nga përdorimi i mjeteve piroteknike, një pjesë e objektit u përfshi nga një zjarr i vogël, i cili u shua menjëherë.

Policia deklaroi se zyrtarët e saj komunikuan vazhdimisht me protestuesit, duke u kërkuar atyre që tubimi të zhvillohej qetësisht dhe që të mos hidheshin sende apo mjete të rrezikshme drejt objekteve shtetërore.

Sipas komunikatës, protesta përfundoi rreth njëzet minuta pas mesnatës. Nuk u raportua për incidente të mëdha, ndërsa nuk pati të lënduar as mes protestuesve dhe as në radhët e zyrtarëve policorë.

Qytetarët u falënderuan nga Policia për mirëkuptimin dhe bashkëpunimin e treguar, posaçërisht gjatë ndërprerjeve të përkohshme të trafikut.

Policia njoftoi gjithashtu se do të vijojë me praninë dhe patrullimet në terren, me qëllim garantimin e rendit kushtetues dhe të sigurisë publike në vend.

Protesta u organizua për të shprehur pakënaqësinë e qytetarëve ndaj vendimit të Gjykatës Speciale, e cila të mërkurën në Hagë shpalli fajtorë katërshen e UÇK-së. Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet.

EULEX-i është misioni i Bashkimit Evropian për sundimin e ligjit në Kosovë. Bashkimi Evropian është financuesi kryesor i Gjykatës Speciale, selia e së cilës ndodhet në Hagë të Holandës.