Përparim Rama: Kryetarët e komunave do të protestojnë në shtator para Qeverisë Kurti

Kryetari i Prishtinës, Përparim Rama, ka bërë të ditur se në shtator, kryetarët e komunave të Kosovës do të organizojnë protestë përpara Qeverisë Kurti.

Ai e ka akuzuar ekzekutivin për shkelje të pandërprera të ligjit dhe për ushtrim të trysnisë financiare ndaj komunave që nuk drejtohen nga Vetëvendosje.

Rama pretendon se, prej vitit 2022, komunave u janë marrë më shumë se 344 milionë euro për detyrime që nuk janë krijuar prej tyre. Sipas tij, njëkohësisht po bllokohen fondet dhe po pengohet realizimi i projekteve lokale.

“Komunat nuk u përkasin kryetarëve, por qytetarëve”, ka deklaruar Rama në reagimin e tij.

Në postimin e plotë, ai ka thënë se sot të gjithë kryetarët e komunave janë të bashkuar dhe se së bashku do të dalin në protestën e shtatorit para Qeverisë Kurti.

Sipas Ramës, kryetarët e komunave të Kosovës janë mbledhur për të kundërshtuar shkeljet e vazhdueshme ligjore dhe atë që ai e cilëson si qasje totalitare të Qeverisë Kurti ndaj pushtetit lokal.

Ai ka kujtuar paralajmërimin e bërë gjatë fushatës për zgjedhjet lokale se komunave që nuk udhëhiqen nga Vetëvendosje nuk do t’u ndahej buxhet. Rama vlerëson se kjo deklaratë tashmë po shndërrohet në një praktikë të rrezikshme, përmes bllokimit të fondeve, pengimit të projekteve dhe ndëshkimit financiar të komunave që nuk janë nën kontrollin e pushtetit.

Kryetari i Prishtinës ka përsëritur se komunave u janë marrë mbi 344 milionë euro që nga viti 2022 për obligime të cilat nuk i kanë krijuar vetë.

Ai ka theksuar se fondet po mbahen të bllokuara, ndërsa investimet që u takojnë qytetarëve po pengohen.

Sipas Ramës, përmes presionit politik dhe financiar po bëhet përpjekje për ta nënshtruar nivelin lokal të qeverisjes.

Rama ka ritheksuar se komunat nuk janë pronë e kryetarëve, por u përkasin qytetarëve.

Ai ka deklaruar se, kur Qeveria pengon një komunë vetëm për faktin se ajo nuk drejtohet nga Vetëvendosje, goditja nuk i bëhet një kryetari. Sipas tij, në këtë mënyrë qytetarit i mohohet një rrugë, një çerdhe, një shkollë ose një shërbim, vetëm për shkak të votës së tij.

Në përfundim, Rama e ka cilësuar këtë qasje si primitive, diskriminuese dhe të rrezikshme për demokracinë. Ai ka thënë se qytetarët nuk mund të ndahen në kategoritë “me ne” dhe “me ata”, ndërsa fondet publike nuk mund të bllokohen në varësi të hartës elektorale.