PDK u bën thirrje partive: Nesër në orën 11:00 të mblidhemi në Kuvend

Arian Tahiri, deputet i PDK-së, i është drejtuar publikisht kryesuesit Avni Dehari dhe Lëvizjes Vetëvendosje, duke u kërkuar që të krijojnë kushtet për vazhdimin e seancës dhe konstituimin e Kuvendit të Kosovës.

Ai akuzoi VV-në se, përmes kryesuesit dhe mosftimit të seancës, po bllokon konstituimin e Kuvendit, ndonëse, sipas tij, thirrja e saj përbën detyrim ligjor.

Gjatë një konference për media, Tahiri deklaroi: “Sot kemi dorëzuar kërkesë zyrtare që ai ta përmbushë detyrën e tij, të veprojë në përputhje me ligjin dhe Kushtetutën dhe ta ftojë seancën”.

Sipas deputetit të PDK-së, kërkohet që seanca të thirret çdo 48 orë, me synimin që Kuvendi të bëhet funksional. Ai njoftoi se subjektet politike janë ftuar të marrin pjesë në seancë nesër, në orën 11:00.

“Aleanca e ka pranuar pozitivisht ftesën, ndërsa presim të njëjtën përgjigje edhe nga subjektet e tjera, në mënyrë që të mblidhemi në seancë dhe ta konstituojmë Kuvendin”, u shpreh Tahiri.

Ai paralajmëroi se PDK-ja do ta përshkallëzojë reagimin e saj nëse, siç pretendoi, pengesat ndaj funksionalizimit të Kuvendit vazhdojnë.

“Reagimi ynë do të bëhet gjithnjë e më i fuqishëm, pasi askush nuk e toleron një pushtet autoritar”, tha deputeti.

Tahiri e përshkroi gjendjen e krijuar si shkelje të rendit kushtetues, ndërsa nënvizoi se mbajtja jofunksionale e Kuvendit po dëmton funksionimin institucional të vendit.