PDK mbledh Kryesinë, Gruda flet për ftesën e Kurtit dhe temat e takimit

Partia Demokratike e Kosovës ka filluar mbledhjen e Kryesisë, në të cilën po diskutohen rezultatet e zgjedhjeve të certifikuara një ditë më parë, si edhe zhvillimet politike që kanë pasuar.

Para nisjes së kësaj mbledhjeje, deputeti i zgjedhur i PDK-së, Përparim Gruda, njoftoi se partia e ka pranuar ftesën për takim nga kryeministri në detyrë, Albin Kurti.

Siç raportoi gazetari i Klan Kosovës, Kastriot Tahiti, në një lidhje direkte, Gruda theksoi se në këtë takim do të hapen temat që kanë të bëjnë me krijimin e institucioneve të reja.

Sipas Grudës, rezultati i zgjedhjeve ka treguar se asnjë subjekt politik nuk e ka marrë mbështetjen e nevojshme për ta formuar i vetëm qeverinë, prandaj formimi i institucioneve, sipas tij, kërkon një marrëveshje politike.

Ai sqaroi gjithashtu se në takimin me Kurtin nuk do të diskutohet vetëm për themelimin e institucioneve, por edhe për çështjen e presidentit të vendit.

Në mbledhjen e Kryesisë së PDK-së pritet po ashtu të shqyrtohen qëndrimet e partisë për zhvillimet e fundit politike dhe veprimet e mëtejshme në procesin e konstituimit të institucioneve.