PDK-ja konteston në Kushtetuese Qeverinë Kurti IV, një ditë pas ankesës për Kuvendin

Partia Demokratike e Kosovës do ta dërgojë sot në Gjykatën Kushtetuese edhe çështjen e formimit të Qeverisë Kurti IV. Ky hap ndërmerret vetëm një ditë pasi partia kontestoi në të njëjtin institucion procesin e konstituimit të Kuvendit të Kosovës.

Për këtë çështje, kryetari i Grupit Parlamentar të PDK-së, Arian Tahiri, së bashku me deputetin Përparim Gruda, do të dalin në një konferencë për media para ndërtesës së Gjykatës Kushtetuese në orën 9:00.

Në fokus të kontestimit pritet të jetë mënyra se si u konstituua Qeveria Kurti IV, votimi i së cilës u zhvillua pasi procesi për konstituimin e Kuvendit ishte shpallur i përfunduar.

Legjislativi u konsiderua i konstituuar ndonëse nuk ishin zgjedhur të pesë nënkryetarët e paraparë, pasi kandidatja e PDK-së për këtë pozitë, Vlora Çitaku, nuk mori votat.

PDK-ja fillimisht e kishte tërhequr përkohësisht kandidaturën e Çitakut, ndërsa më vonë kundërshtoi mbylljen e seancës konstituive pa përfunduar zgjedhja e të gjithë nënkryetarëve.

Të hënën, pasi lënda ishte dorëzuar në Gjykatën Kushtetuese, Tahiri deklaroi se subjekti i tij politik po kërkonte vlerësim mbi kushtetutshmërinë e procedurës së ndjekur për konstituimin e Kuvendit.

Krahas kësaj kërkese, PDK-ja i kërkoi Kushtetueses edhe vendosjen e një mase të përkohshme, duke argumentuar se ajo nevojitet për të penguar pasoja të tjera juridike dhe institucionale.

Prandaj, kontestimi i sotëm ndaj Qeverisë Kurti IV ndërlidhet me kundërshtimin paraprak për konstituimin e Kuvendit, organi që më pas votoi ekzekutivin e ri.

KosovaPress do ta transmetojë konferencën e PDK-së që do të zhvillohet para Gjykatës Kushtetuese.