Pas tragjedisë në Shkup, avokati Koci kërkon të dhëna për ndërtimin dhe sigurinë e rrugës

Avokati Arianit Koci ka nisur një kërkesë publike për të mbledhur informacione rreth aksidentit fatal në aksin rrugor Shkup-Bllacë, ku humbën jetën tre shtetas shqiptarë.

Në cilësinë e përfaqësuesit ligjor të familjes, Koci synon të zbulojë se cila kompani e ndërtoi këtë pjesë të rrugës, kush i mbikëqyri punimet dhe kush mbante përgjegjësi për masat e sigurisë në atë zonë.

Në një deklaratë të detajuar, ai vuri në dukje se hyrja nga e cila depërtoi automjeti në segmentin rrugor ishte e hapur në momentin e ngjarjes, ndërsa një tjetër hyrje, rreth 300 metra më tutje, gjendej e bllokuar fizikisht.

Për këtë arsye, avokati ngre disa pyetje kyçe që kërkojnë sqarim: pse dy akset hyrëse të të njëjtit segment nuk u siguruan në mënyrë uniforme, a kishte qenë e mbyllur më parë hyrja ku ndodhi aksidenti, deri në çfarë date kishte zgjatur ajo gjendje dhe kush e urdhëroi mbylljen e saj fizike menjëherë pas tragjedisë.

Koci u bëri thirrje qytetarëve që posedojnë fotografi, video-incizime, dokumente apo çfarëdolloj prove tjetër që mund të ndihmojë në zbardhjen e rastit, t’i dërgojnë ato me shkrim në çdo formë të mundshme.

Ndërkohë, vetëm dy ditë pasi doli publikisht për të kërkuar përgjegjësi, avokati tashmë është duke u marrë me paraqitjen e provave dhe ndjekjen e procedurave ligjore në Maqedoninë e Veriut.

Viktimat e kësaj ngjarjeje të rëndë, të regjistruar më 19 korrik, janë Ejup Tërnava, Xhenet Tërnava dhe Fatmire Shabani.