Para Kuvendit të LDK-së, Saim Tahiraj apelon për votë të përgjegjshme dhe unitet

Veprimtari Saim Tahiraj, në prag të Kuvendit të Lidhjes Demokratike të Kosovës, u ka kërkuar delegatëve ta përdorin votën me përgjegjësi, duke vënë në plan të parë bashkimin e partisë dhe të ardhmen e vendit.

Në prononcimin për “Bota sot”, ai ka nënvizuar se në Kuvend nuk do të përcaktohet vetëm kryetari apo kursi politik. Sipas Tahirajt, ky vendim do të ndikojë në të ardhmen e LDK-së dhe, në masë të madhe, edhe në drejtimin që do të ndjekë Kosova.

Ai u ka kujtuar delegatëve se mbajnë mbi vete një përgjegjësi të jashtëzakonshme, pasi çdo votë e tyre do t’u përcjellë një mesazh qindra mijëra anëtarëve, veprimtarëve dhe përkrahësve të LDK-së. Tahiraj ka thënë se ata presin nga Kuvendi mbi të gjitha unitet, si dhe një LDK më të fuqishme, më të bashkuar dhe më të përgatitur për t’i shërbyer Kosovës.

Delegatët, sipas tij, nuk duhet të lejojnë që emocionet e momentit, inatet, xhelozitë ose interesat individuale të vendosen mbi të mirën e LDK-së. Ai ka vlerësuar se dukuri të tilla e kanë dëmtuar vazhdimisht familjen e tyre politike dhe u kanë sjellë kënaqësi vetëm kundërshtarëve. Për këtë arsye, Tahiraj u ka bërë thirrje t’i lënë ato pas dhe të tregojnë pjekuri, urtësi e përgjegjësi.

Në mesazhin e tij, veprimtari ka sjellë në vëmendje edhe trashëgiminë politike të presidentit historik të Kosovës, Ibrahim Rugova, duke kërkuar që brenda LDK-së të mbrohet fryma demokratike dhe bashkuese.

Tahiraj ka rikujtuar se Ibrahim Rugova e ndërtoi vizionin e LDK-së mbi demokracinë, dialogun, respektin dhe bashkimin. Këtë trashëgimi ai e ka cilësuar si një amanet që delegatët duhet ta ruajnë me dinjitet, duke shtuar se partia, sot më shumë se kurrë, ka nevojë për secilin prej tyre për ta fuqizuar unitetin dhe jo për t’i thelluar ndarjet.

Sipas tij, historia do t’i nderojë ata delegatë që, në një çast vendimtar, i japin përparësi bashkimit ndaj përçarjes, përgjegjësisë ndaj interesave personale dhe së ardhmes së LDK-së ndaj çdo përllogaritjeje tjetër.

Ai ka theksuar se kjo është dita kur delegatët duhet të tregojnë se e meritojnë besimin e marrë nga anëtarësia.

“Mbi të gjitha LDK-ja. Mbi të gjitha Kosova. Të bashkuar jemi më të fortë”, ka deklaruar Tahiraj për “Bota sot”.