Pacolli: Pa institucione funksionale e në mes fushatës, si mund të mbrohen krerët e UÇK-së në Hagë?

Ministrja e Mjedisit dhe Planifikimit Hapësinor, Fitore Pacolli, ka shprehur kritika për mënyrën se si, sipas vlerësimit të saj, po trajtohet çështja e ish-krerëve të UÇK-së që po gjykohen në Hagë.

Ajo ka shtruar pyetjen se si është e mundur të mbrohen ata në Hagë në një kohë kur institucionet nuk janë funksionale dhe vendi mund të hyjë në proces zgjedhor.

“E qysh po ua merr mendja me i mbrojtë ata në Hagë, pa president e në fushatë zgjedhore?”, ka shkruar Pacolli.

Sipas saj, kundërshtarët politikë po e shfrytëzojnë çështjen e ish-krerëve të UÇK-së për interesa elektorale.

“Kë po dojnë me e mbrojtë kështu? Se ata në Hagë, jo që nuk po i mbrojnë, por po i keqpërdorin për fushatë”, ka deklaruar ajo.

Ministrja ka theksuar se përpjekja për të barazuar fatin politik të një partie me fatin historik të UÇK-së përbën keqpërdorim të luftës për interesa të ngushta partiake.

“Përpjekja për ta barazuar fatin politik të një partie me fatin historik të UÇK-së është keqpërdorim i luftës për interesa të ngushta partiake”, ka shkruar ajo.

Pacolli ka përsëritur qëndrimin e saj kundër Gjykatës Speciale, duke theksuar se ka qenë dhe mbetet kundër saj.

“Ne kemi qenë dhe jemi kundër kësaj Gjykate”, ka theksuar Pacolli.

Si rrugë më të mirë për mbrojtjen e krerëve të UÇK-së në Hagë, ajo ka përmendur funksionalizimin e institucioneve të Kosovës dhe bashkëpunimin institucional për mbrojtjen e luftës çlirimtare.

“Mënyra më e mirë për t’i mbrojtur krerët e UÇK-së në Hagë është t’i funksionalizojmë institucionet e Kosovës dhe të punojmë bashkë në mbrojtjen e luftës çlirimtare të Kosovës, e cila ishte e drejtë dhe e pastër”, ka përfunduar ajo.