Pacolli kërkon reagim ndërkombëtar ndaj Vuçiqit: Kosova do t’i mbrojë resurset ujore

Fitore Pacolli, ministre në detyrë e Mjedisit dhe e Planifikimit Hapësinor, ka reaguar pas deklaratës së presidentit serb, Aleksandar Vuçiq, lidhur me mundësinë e ndërhyrjes në resurset ujore dhe në infrastrukturën e sistemit Ibër-Lepenc.

Pacolli e cilësoi qëndrimin e Vuçiqit si thellësisht shqetësues dhe të papranueshëm.

Ajo kujtoi se Konventa e Helsinkit i detyron shtetet të bashkëpunojnë për shfrytëzimin e drejtë dhe të arsyeshëm të ujërave ndërkufitare, të shmangin dëmet përtej kufijve dhe të ruajnë ekosistemet ujore. Sipas saj, resurset e ujit nuk mund të shndërrohen në mjete kërcënimi, presioni ose destabilizimi kundër një shteti tjetër.

Ministrja në detyrë theksoi se Liqeni i Ujmanit dhe sistemi Ibër-Lepenc përbëjnë infrastrukturë kritike strategjike të Republikës së Kosovës. Ajo nënvizoi se ky sistem ka rëndësi jetike për furnizimin me ujë të pijshëm të qindra mijëra qytetarëve, funksionimin e sektorit energjetik, bujqësinë dhe ruajtjen e ekuilibrit mjedisor në një pjesë të konsiderueshme të vendit.

Sipas Pacollit, çdo veprim apo deklaratë që synon ndërhyrjen, dëmtimin, devijimin ose ndryshimin e njëanshëm të rrjedhave dhe infrastrukturës ujore, duke shkaktuar pasoja për Kosovën, nuk mund të trajtohet si temë e politikës së përditshme. Ajo tha se bëhet fjalë për sigurinë ujore, energjetike, mjedisore dhe njerëzore, ndaj bashkësia ndërkombëtare duhet ta shqyrtojë këtë çështje me seriozitetin më të madh.

Pacolli i bëri thirrje Bashkimit Evropian, Shteteve të Bashkuara të Amerikës, Kombeve të Bashkuara dhe partnerëve të tjerë ndërkombëtarë që të reagojnë ndaj deklaratave të këtij lloji dhe të kërkojnë zbatimin e plotë të parimeve dhe detyrimeve që burojnë nga e drejta ndërkombëtare për ujërat ndërkufitare.

Në fund, ajo deklaroi se Republika e Kosovës do të mbrojë resurset e veta ujore, infrastrukturën kritike dhe interesat e qytetarëve, në përputhje me Kushtetutën, ligjet e Republikës së Kosovës dhe parimet e së drejtës ndërkombëtare.