Pacolli kërkon hetim nga SPAK: Terminali i Vlorës u mbajt i uzurpuar nga grupe kriminale për mbi 10 muaj

Në media është bërë e ditur se në Aeroportin e Vlorës ka pasur një konflikt mes punonjësve të kompanisë së biznesmenit Behgjet Pacolli dhe një kompanie sigurie, në kohën kur po vijonin punimet në kantier.

Për këtë situatë ka reaguar vetë Behgjet Pacolli, i cili deklaron se, pas muajsh të gjatë bllokimi të paligjshëm dhe uzurpimi të Terminalit të Vlorës nga grupe kriminale, MABCO dhe nënkontraktorët e saj kanë arritur sot të rikthehen në vendet e punës.

Sipas Pacollit, aktualisht po bëhet verifikimi dhe dokumentimi i dëmeve që, sipas tij, janë shkaktuar nga vandalizmi, vjedhjet dhe shkatërrimet gjatë kësaj periudhe.

Ai shprehet se për më shumë se dhjetë muaj, këto grupe kriminale kanë vepruar në shkelje të hapur të ligjit, duke përdorur metoda të papranueshme dhe çnjerëzore, çka sipas tij ka cenuar jo vetëm pronën private, por edhe rendin juridik dhe sigurinë e investimeve. Pacolli shton se edhe më shqetësues është dyshimi se kjo veprimtari është mbështetur ose toleruar nga individë të fshehur pas petkut institucional, ndërsa në raste të caktuara, sipas tij, është tentuar të ndikohet edhe mbi procese gjyqësore, në sfidë të hapur ndaj sistemit të drejtësisë në Shqipëri.

Postimi i tij i plotë:

Të dashur qytetarë,

Të dashur vlonjatë,

Ju, qytetarë të nderuar, keni të drejtën të informoheni mbi të vërtetën. Fatkeqësisht, ende nuk jeni njohur me gjendjen reale në Aeroportin e Vlorës. Për këtë arsye, i bëj thirrje urgjente SPAK-ut të nisë menjëherë hetime të plota mbi këtë skandal të rëndë, të krijuar dhe ushqyer nga individë që kanë vepruar dhe vazhdojnë të veprojnë në kundërshtim me ligjin, duke cenuar rëndë shtetin e së drejtës dhe sistemin juridik të Republikës së Shqipërisë. Koha për të zbardhur të vërtetën dhe për të vënë përgjegjësit para drejtësisë është tani.

Pas muajsh të tërë bllokade të paligjshme dhe uzurpimi të Terminalit të Vlorës nga grupe kriminale, sot MABCO dhe nënkontraktorët tanë kanë mundur të rikthehen në vendet e tyre të punës. Në këto momente po kryhet verifikimi dhe evidentimi i dëmeve të shkaktuara nga vandalizmi, vjedhjet dhe shkatërrimet e ndodhura gjatë kësaj periudhe.

Dëmet e konstatuara përfshijnë si inventarin e çmuar, të projektuar, porositur, prodhuar dhe instaluar posaçërisht për funksionimin e aeroportit, ashtu edhe instrumentet, pajisjet dhe mjetet e punës që përbëjnë pronë private të kompanive nënkontraktuese.

Për më shumë se dhjetë muaj, këto grupe kriminale kanë vepruar në kundërshtim flagrant me ligjin, me metoda të papranueshme dhe çnjerëzore, duke cenuar jo vetëm pronën private, por edhe rendin juridik dhe sigurinë e investimeve. Më shqetësues është fakti se veprimtaria e tyre dyshohet se është mbështetur ose toleruar nga individë që fshihen pas petkut institucional, ndërsa në raste të caktuara kanë tentuar të ndikojnë edhe procese gjyqësore, duke sfiduar hapur sistemin e drejtësisë në Shqipëri.

Sot, në emër të ligjit, të drejtësisë dhe të besimit që qytetarët shqiptarë dhe partnerët ndërkombëtarë duhet të kenë tek institucionet e shtetit, i bëj thirrje publike SPAK që të nisë menjëherë një hetim të plotë, të pavarur dhe gjithëpërfshirës për të gjitha ngjarjet kriminale të ndodhura gjatë kësaj periudhe, pa asnjë dallim dhe pa asnjë mbrojtje për askënd, pavarësisht pozitës, ndikimit apo lidhjeve që mund të ketë.

Është e domosdoshme të identifikohet dhe të vihet përpara përgjegjësisë i gjithë zinxhiri i personave të përfshirë në këto veprime të rënda, të cilat kanë dëmtuar interesin publik, sigurinë juridike dhe imazhin e Shqipërisë si një vend që garanton shtetin e së drejtës dhe mbrojtjen e investimeve.

Po aq e rëndësishme është që institucionet kompetente të marrin masa të menjëhershme për të parandaluar çdo përshkallëzim të mundshëm të situatës dhe për të garantuar sigurinë e punonjësve, të kompanive kontraktuese dhe të çdo qytetari që beson tek puna, ligji dhe vlerat e një shoqërie të qytetëruar.

Ne do të vazhdojmë të mbrojmë me vendosmëri të drejtat tona ligjore, pronën tonë dhe dinjitetin e njerëzve të punës, duke besuar se e vërteta dhe drejtësia do të mbizotërojnë.