OVL e UÇK-së vendos për protesta në qytetet ku veprojnë degët dhe strukturat e saj

OVL e UÇK-së, pas mbledhjes së zhvilluar me kryetarët e degëve, ka vendosur të organizojë protesta në të gjitha qytetet e Kosovës ku janë të pranishme degët dhe strukturat e saj.

Në të gjitha qytetet, protestat janë paraparë të nisin në orën 17:00. Përjashtim bën dega e Prishtinës, e cila do t’i bashkohet protestës së planifikuar për në orën 21:00.

Në vendim u bëhet thirrje institucioneve komunale dhe qytetarëve anembanë Kosovës që të marrin pjesë në këto protesta, në përkrahje të ish-krerëve të UÇK-së dhe vlerave të luftës çlirimtare. OVL e UÇK-së deklaron se përkrah dhe do të vazhdojë të përkrahë çdo protestë në mbështetje të ish-krerëve të UÇK-së dhe luftës çlirimtare, për sa kohë që tubimet mbeten paqësore dhe nuk e cenojnë rendin kushtetues.

Përballë kësaj situate, OVL e UÇK-së kërkon unitet nga i gjithë spektri politik, shtetëror dhe kombëtar. Ajo bën thirrje që të nisë sa më shpejt hartimi i një strategjie kombëtare, e cila, sipas organizatës, do t’u siguronte ish-krerëve të UÇK-së mbështetje të plotë deri në marrjen e vendimit nga Apeli.