Opozita kundërshton përzgjedhjen e kandidatëve për Bordin e ZRRE-së, Kuvendi nis procedurën e votimit

Kuvendi i Kosovës ka hapur procedurën për zgjedhjen e dy anëtarëve të Bordit të Zyrës së Rregullatorit të Energjisë (ZRRE), proces që është shoqëruar me kritika nga partitë opozitare për mënyrën se si Qeveria ka përzgjedhur kandidatët.

Deputeti i Lëvizjes Vetëvendosje, Taulant Kelmendi, njoftoi se nga katër kandidatët e propozuar do të zgjidhen dy, përmes votimit të fshehtë. Anëtarët e rinj do të kenë mandat pesëvjeçar.

Kelmendi deklaroi se Grupi Parlamentar i LVV-së e mbështet zgjedhjen e anëtarëve të rinj, duke e vlerësuar funksionalizimin e ZRRE-së si të rëndësishëm.

Ai bëri të ditur se kandidatët e propozuar nga Qeveria janë Driton Gojani, Lutfie Dervishi, Hana Jakupi dhe Senat Bolluzerti, ndërsa përsëriti se dy prej tyre do të përzgjidhen me votim të fshehtë për një mandat pesëvjeçar.

Ndaj procesit reagoi deputeti i PDK-së, Arben Mustafa, i cili vuri në pikëpyetje kriteret e përdorura për përzgjedhjen e katër emrave.

Mustafa tha se deputetët kanë marrë listën e kandidatëve të rekomanduar, por jo edhe një shpjegim të qartë se përse janë propozuar pikërisht këta emra. Sipas tij, nga dokumentet e vlerësimit rezulton se kandidatët e zgjedhur nga Qeveria nuk janë ata që kanë marrë më shumë pikë, por persona që renditen në pjesën e fundit të listës.

Deputeti i PDK-së e cilësoi procesin si të improvizuar dhe të politizuar, duke pretenduar se ai nuk synon zgjedhjen e kandidatëve më të mirë për Bordin e ZRRE-së, por dërgimin në Kuvend të personave të preferuar nga Qeveria. Ai kërkoi të dihet edhe qëllimi i procesit të vlerësimit dhe intervistimit të kandidatëve.

Kritika shprehu edhe deputeti i LDK-së, Ermal Sadiku. Ai tha se komisioni vlerësues i kishte renditur 13 kandidatët në bazë të pikëve, përvojës profesionale dhe arsimit, por se Qeveria nuk kishte përfshirë në propozim kandidatët me vlerësimin më të lartë.

Sadiku theksoi se personi i renditur i pari, si dhe kandidatët e pozicionuar në vendin e tretë dhe të katërt, nuk janë përzgjedhur për t’u paraqitur para Kuvendit. Në listën e propozuar, sipas tij, janë përfshirë kandidatët e renditur në vendin e dytë, të shtatë, të tetë dhe në vendin e gjashtë.

Ai u bëri thirrje deputetëve të mos votojnë persona që, sipas vlerësimit të komisionit të pavarur, nuk e kishin merituar të ishin pjesë e listës së dorëzuar në Kuvend.

Edhe deputeti i AAK-së, Burim Ramadani, kërkoi sqarime për procedurën. Ai tha se në materialet e paraqitura në komision nuk kishte asnjë arsyetim lidhur me mosrespektimin e renditjes së bërë nga komisioni rekomandues.

Ministrja e Ekonomisë, Artane Rizvanolli, e mbrojti procesin e ndjekur nga Qeveria. Ajo deklaroi se konkursi ishte transparent dhe se kandidatët ishin shqyrtuar nga një komision i përbërë nga ekspertë të fushës.

Rizvanolli kundërshtoi pretendimet se emrat e propozuar nuk i plotësojnë kriteret. Ajo tha se diferencat mes kandidatëve nuk janë aq të mëdha sa pretendohet, duke përmendur një diferencë prej 10 pikësh dhe një dallim që, sipas saj, është rreth 70 dhe 80 për qind.

Ministrja shtoi se komisioni i ekspertëve e kishte kryer vlerësimin dhe ia kishte dorëzuar Qeverisë listën e kandidatëve që i konsideronte të emërueshëm, ndërsa kërkoi që të mos shpërndaheshin informacione të pasakta për kriteret e kandidatëve.

Deputeti i LDK-së, Armend Zemaj, reagoi ndaj deklaratës së ministres. Ai tha se Rizvanolli kishte pranuar se kandidatët ishin vlerësuar nga ekspertë të fushës, por se Qeveria nuk e kishte respektuar renditjen e përcaktuar prej tyre.

Zemaj shtoi se mosrespektimi i vlerësimit të dy ekspertëve eminentë tregon se përzgjedhja është bërë mbi bazën e perceptimit të Qeverisë dhe jo sipas renditjes profesionale të komisionit.

Rizvanolli iu përgjigj duke deklaruar se vendimi për përzgjedhjen përfundimtare është në diskrecionin e Qeverisë. Ajo tha se rezultatet e vlerësimit janë njohur, por se Qeveria ka të drejtë të vendosë për emrat që do t’i dërgojë për votim.

Ministrja u shpreh se ata që duan të bëjnë një përzgjedhje tjetër duhet të fitojnë votat dhe të vijnë në Qeveri.

Me 66 vota për, asnjë kundër dhe asnjë abstenim, Kuvendi i Kosovës miratoi Komisionin Zgjedhor për përzgjedhjen e anëtarëve të Bordit të Zyrës së Rregullatorit të Energjisë.