Operacion i gjerë i Krimeve Ekonomike: mbi 40 lokacione nën bastisje, dyshime për mashtrim në importin e naftës

Nga orët e para të mëngjesit ka nisur një operacion i gjerë i udhëhequr nga Prokuroria Speciale, i cili po zhvillohet në më shumë se 40 lokacione në të gjithë Kosovën, pas një hetimi disamujor për dyshime mbi një skemë të organizuar kriminale.

Në këtë aksion janë përfshirë Prokuroria Speciale, Njësia e Hetimeve Tatimore e ATK-së, Policia e Kosovës dhe Njësia e Hetimeve e Doganës së Kosovës, bëjnë të ditur burime të medias.

Sipas të njëjtave burime, hetimi ka të bëjë me dyshime për pastrim parash, shmangie të pagesës së tatimeve dhe doganave, si edhe transaksione fiktive në sektorin e derivateve të naftës.

Burimet po ashtu thonë se ekzistojnë dyshime për një skemë kriminale, përmes së cilës kompani importuese nga Shqipëria dyshohet se kanë futur ujë në vend të derivateve të naftës, duke shfrytëzuar kompani fiktive dhe kompani aktive në Kosovë për zbatimin e skemës dhe fshehjen e gjurmëve të transaksioneve.

Sipas burimeve, Hetimet Tatimore të ATK-së dyshojnë gjithashtu se disa nga bizneset e përfshira kanë lëshuar fatura fiktive për importe të pretenduara të derivateve të naftës, me synimin për t’iu shmangur detyrimeve tatimore dhe për të siguruar përfitime të kundërligjshme financiare.

Aksioni vazhdon ende.

Një operacion i madh po zhvillohet që nga orët e hershme të mëngjesit në disa lokalitete.

Ky aksion po realizohet nga Prokuroria Speciale, Njësia e Hetimeve Tatimore e ATK-së, Policia e Kosovës dhe Njësia e Hetimeve e Doganës së Kosovës.

Burime të medias pohojnë se hetimi lidhet me dyshime për shmangie tatimore, përdorim të kompanive fiktive dhe shpëlarje parash.

Operacioni përfshin bastisje të njëkohshme në disa lokacione.