Nezir Kraki mbështet qëndrimin e Abdixhikut për presidentin: LDK-ja duhet të lehtësojë, jo të pengojë funksionimin institucional

Deputeti i LDK-së, Nezir Kraki, ka shprehur publikisht mbështetjen e tij për qasjen e kryetarit të partisë, Lumir Abdixhiku, sa i përket procesit të zgjedhjes së presidentit të Kosovës.

Sipas Krakit, Abdixhiku ka vepruar drejt kur është përpjekur që LDK-së t’ia rikthejë rolin e një subjekti politik që ndihmon në funksionimin e institucioneve, në vend që t’i bllokojë ato.

“Dua ta përshëndes publikisht qasjen e Kryetarit të LDK-së lidhur me çështjen e presidentit”, ka shkruar Kraki.

Ai ka deklaruar se qëllimi ishte rikthimi i LDK-së në pozitën e një force që kontribuon në mbarëvajtjen institucionale të vendit.

“Lumir Abdixhiku me të drejtë deshi t’ia rikthente LDK-së rolin që i takon, dmth rolin e një partie që ua mundëson gjërave të bëhen, jo që i bllokon ato”, ka deklaruar ai.

Kraki ka theksuar se në qendër të vëmendjes duhet të jetë funksionimi i institucioneve të Kosovës, ndërsa ka kundërshtuar atë që e ka cilësuar si “logjika e komitave”.

“Gjënë më të rëndësishme për ne të gjithë, Kosovën me institucione”, ka shkruar Kraki.

Në përmbyllje, deputeti ka dhënë edhe një paralajmërim politik për zhvillimet e ardhshme brenda LDK-së.

“LDD e re do ta ketë fatin e LDD-së së vjetër”, ka përfunduar ai.