Nënpërfaqësimi dhe pasivizimi i adresave shqetësojnë shqiptarët e Luginës, kërkohet angazhimi amerikan

Gjendja e shqiptarëve në Luginën e Preshevës dhe problemet me të cilat përballen ata u diskutuan gjatë një takimi në selinë e Këshillit Kombëtar Shqiptar, ku kryetari Enkel Rexhepi priti përfaqësues të Ambasadës së Shteteve të Bashkuara të Amerikës në Beograd.

Në këtë takim ishin të pranishëm diplomati amerikan dhe sekretari i parë Pepijn Helgers, zyrtarja e Seksionit Politik Ksenija Lazović, si dhe zyrtari politik Joseph “Joe” Gayeski.

Rexhepi bëri të ditur se pasivizimi i adresave të shqiptarëve në Luginën e Preshevës ishte një prej çështjeve qendrore të bisedës.

Sipas tij, ky proces po përdoret si procedurë administrative për atë që ai e përshkroi si “spastrimi etnik i shqiptarëve në Luginë me mjete administrative”.

Kryetari i Këshillit Kombëtar Shqiptar akuzoi Qeverinë e Serbisë se nuk ka zbatuar marrëveshjet e nënshkruara, çka, sipas tij, ka penguar zhvillimin ekonomik të Luginës dhe ka dobësuar përfaqësimin e shqiptarëve në institucionet shtetërore.

“Moszbatimi i marrëveshjeve të nënshkruara nga ana e Qeverisë serbe, e ka lënë Luginën si rajonin më të pazhvilluar, ndërsa shqiptarët të nënpërfaqësuar, të diskriminuar dhe me jetesë të vështirësuar”, ka shkruar Rexhepi.

Gjatë takimit është vënë në dukje se situata e shqiptarëve në Luginë është rënduar në krahasim me 15 vjet më parë.

Rexhepi deklaroi se përjashtimi institucional dhe mosintegrimi i shqiptarëve në institucionet e Serbisë kanë sjellë ulje të numrit të policëve, gjykatësve dhe prokurorëve shqiptarë, krahasuar me 15 vjet më parë.

Ai pretendoi se në disa institucione republikane nuk është i pranishëm asnjë përfaqësues shqiptar.

Rexhepi e përmbylli postimin duke i cilësuar Shtetet e Bashkuara si “aleati kryesor i shqiptarëve”. Ndërkohë, Ambasadën Amerikane në Beograd e vlerësoi si ambasadë mike të Këshillit Kombëtar Shqiptar dhe të shqiptarëve të Luginës së Preshevës.