Në hapje të Komunitetit Politik Evropian në Dublin, Micheál Martin mirëpret Albin Kurtin

Kryeministri Albin Kurti u prit nga homologu irlandez, Micheál Martin, në nisje të takimit të Komunitetit Politik Evropian në Dublin.

Gjatë takimit, Kurti tha se Kosova mbështetet te Irlanda për anëtarësimin e saj në Bashkimin Evropian dhe në NATO.

Sipas Kurtit, BE-ja dhe NATO-ja janë të domosdoshme për demokracinë, prosperitetin dhe sigurinë e përgjithshme. Ai theksoi rëndësinë që udhëheqësit të takohen, të diskutojnë dhe të bashkërendojnë qëndrimet, ndërsa agresioni rus në Ukrainë vazhdon përmes luftës kinetike, sulmeve ndaj infrastrukturës kritike dhe luftës hibride, duke u shtrirë përtej Ukrainës.

Kurti falënderoi gjithashtu popullin irlandez që strehoi më shumë se një mijë refugjatë shqiptarë të Kosovës në vitin 1999. Ata ishin dëbuar nga atdheu për shkak të gjenocidit të forcave të armatosura të Serbisë së Sllobodan Millosheviqit dhe Jugosllavisë.

Një falënderim të posaçëm ai ua drejtoi pjesëtarëve irlandezë të KFOR-it, të cilët kanë shërbyer për më shumë se dy dekada e gjysmë për paqen, sigurinë dhe mbrojtjen e të gjithë qytetarëve të Kosovës.

Samiti i nëntë i Komunitetit Politik Evropian (EPC) në Dublin mbledh udhëheqës të shteteve anëtare të Bashkimit Evropian (BE) dhe të vendeve të tjera evropiane. Në qendër të diskutimeve janë sfidat e përbashkëta të sigurisë, zhvillimet gjeopolitike dhe mundësitë e bashkëpunimit në kontinent.

Rreth 50 udhëheqës ndërkombëtarë do të mblidhen sot në Qendrën e Konventave në Dublin për takimin e EPC-së. Irlanda mban presidencën e BE-së deri në fund të vitit, ndërsa dy ngjarjet e saj kryesore, EPC-ja dhe takimi joformal i Këshillit Evropian, zhvillohen këtë javë.

Ukraina, inteligjenca artificiale dhe kërcënimet hibride në Evropë pritet të mbizotërojnë takimet kryesore të BE-së në Dublin të enjten dhe të premten. Për udhëheqësit e BE-së, ky do të jetë diskutimi i parë i këtij lloji për inteligjencën artificiale.

EPC-ja është një forum joformal ku udhëheqësit evropianë trajtojnë çështje politike dhe strategjike me interes të përbashkët. Forumi u krijua në vitin 2022, pas pushtimit rus të Ukrainës, dhe mblidhet dy herë në vit. Tema e samitit të Dublinit është «Evropa – e fortë, e sigurt dhe e lidhur».