Nagavci: Marrëveshja VV-LDK hap rrugën për tejkalimin e ngërçit institucional

Deputetja e Lëvizjes VETËVENDOSJE!, Arbërie Nagavci, e ka përshëndetur marrëveshjen e arritur me Lidhjen Demokratike të Kosovës për kandidaturën e Bekim Sejdiut për President të Republikës së Kosovës.

Ajo e cilësoi këtë dakordësim si një zhvillim me rëndësi politike dhe institucionale, duke theksuar se marrëveshja u arrit pas negociatave jo të lehta.

Sipas Nagavcit, fakti që është gjetur një emër konsensual tregon se kompromisi dhe përgjegjësia institucionale janë të mundshme edhe përkundër dallimeve politike, kur interesi i vendit vendoset mbi interesat partiake.

Nagavci e përshkroi Bekim Sejdiun si një figurë të respektuar, që mund të shërbejë si pikë bashkimi përtej ndarjeve politike dhe që i jep vlerë procesit për zgjedhjen e Presidentit.

Ajo shprehu shpresën që procedura të përfundojë me sukses dhe që Kosova të krijojë sa më shpejt institucione funksionale e legjitime.

Nagavci tha se kjo marrëveshje mund të përbëjë një hap drejt tejkalimit të ngërçit institucional, duke uruar që procesi të mbyllet sa më shpejt në të mirë të Kosovës dhe qytetarëve të saj.

Deputetja theksoi gjithashtu se Kosovës i nevojiten institucione funksionale, stabilitet politik dhe përgjegjësi mbi të gjitha.