Musliu: Kuvendi nuk është pronë e askujt, deputetët të rikthehen në seancë

Deputetja e PDK-së, Ganimete Musliu, së bashku me kolegët e saj partiakë, ka kërkuar nga salla e Kuvendit të Kosovës që të vijojë seanca konstituive. Ajo u bëri thirrje të gjithë deputetëve, pavarësisht përkatësisë politike, të kthehen në Kuvend dhe ta përmbyllin procesin e konstituimit.

Duke komentuar zhvillimet politike në vend, Musliu deklaroi se Kosova është “marrë peng” nga një parti, e cila, sipas saj, ka vendosur interesat dhe ambiciet për pushtet mbi mirëqenien e qytetarëve.

Ajo theksoi se qytetarët presin politika që do të përmirësojnë shërbimet shëndetësore, do të krijojnë mundësi punësimi për të rinjtë dhe do të sjellin mbështetje për prindërit, bujqit, punëtorët dhe bizneset.

“Sot dua të flas për qytetarët që presin zhvillim të politikave për një shërbim më të mirë shëndetësor. Për prindërit që mezi e dalin muajin. Për të riun që kërkon një vend pune me meritokraci. Për bujkun, për punëtorin, për biznesmenin që lufton çdo ditë për ta mbajtur biznesin gjallë dhe me të drejtë pyesin: Çfarë po ndodh me vendin tonë? Dhe përgjigja është e thjeshtë dhe shumë e qartë.

Kosova është marrë peng dhe kjo është për turp. Kosova është marrë peng nga një parti e cila erdhi në pushtet me fjalë të mëdha. Kosova është marrë peng nga një parti e cila arriti që shpresën e qytetarëve për një jetë të mirëqenë ta keqpërdorë për ambiciet e veta për pushtet”, tha ajo.