Misetiq: Thaçi shpreh mirënjohje për mbështetjen e jashtëzakonshme, kërkon qetësi

Avokati i Hashim Thaçit, Luka Misetiq, ka bërë me dije se mbrojtja do ta apelojë aktgjykimin e shkallës së parë të Dhomave të Specializuara të Kosovës në Hagë, duke pretenduar se gjatë procesit gjyqësor janë cenuar të drejtat themelore të ish-presidentit të Kosovës.

Në një deklaratë pas shpalljes së vendimit, Misetiq tha se Thaçi shpreh mirënjohje për mbështetjen që ai, Kadri Veseli, Rexhep Selimi dhe Jakup Krasniqi kanë marrë nga qytetarët e Kosovës dhe nga mbështetësit ndërkombëtarë.

Ai u bëri thirrje qytetarëve të Kosovës që të qëndrojnë të qetë dhe të reagojnë në mënyrë paqësore ndaj aktgjykimit.

Misetiq njoftoi se ekipi i mbrojtjes do ta apelojë vendimin e shpallur dje në Panelin e Apelit të Dhomave të Specializuara, duke u thirrur në gabime të rëndësishme në ligj dhe në fakte, të cilat sipas tij kanë cenuar drejtësinë e procesit.

Avokati theksoi se mbrojtja kishte ngritur gjatë gjithë procesit shqetësime për drejtësinë procedurale, veçanërisht për mënyrën se si anëtarët e trupit gjykues i bënin pyetje.

Ai tha se gjatë gjykimit mbrojtja kishte shprehur vazhdimisht rezerva lidhur me paanshmërinë procedurale, përfshirë faktin që gjyqtarët bënin drejtpërdrejt një numër të madh pyetjesh në një mënyrë që nuk linte përshtypjen e një trupi të paanshëm.

Misetiq pretendon se ndërhyrjet e trupit gjykues, sipas mbrojtjes, kanë tejkaluar caqet e kërkimit neutral të së vërtetës dhe kanë cenuar standardin e paanshmërisë që e kërkojnë normat ndërkombëtare të drejtësisë.

Mbrojtja mban qëndrimin se këto ndërhyrje gjyqësore e kaluan kufirin e hetimit neutral të fakteve, duke dëmtuar perceptimin e paanshmërisë që kërkohet sipas standardeve ndërkombëtare të drejtësisë.

Avokati i Thaçit ka kontestuar edhe bazën provuese mbi të cilën, sipas tij, është mbështetur konstatimi i fajësisë përtej dyshimit të arsyeshëm.

Në deklaratë thuhet se mbrojtja parashtron se konkluzionet e trupit gjykues për fajësinë përtej dyshimit të arsyeshëm mbështeten në prova të pamjaftueshme dhe të pakorroboruara.

Misetiq e vuri në dukje në mënyrë të veçantë çështjen e vrasjes së Behajdin Allaqit, për të cilën tha se Paneli e ka lidhur publikisht Thaçin me këtë vrasje, ndonëse më parë kishte urdhëruar që rasti të mos diskutohej publikisht dhe provat përkatëse të mbaheshin konfidenciale.

Ai saktësoi se Paneli i Gjykimit kishte pohuar dje publikisht se z. Thaçi ishte i përfshirë në vrasjen e Behajdin Allaqit, megjithëse më parë u kishte kërkuar të gjitha palëve që çështjen Allaqi të mos e përmendnin në seancë publike dhe kishte vendosur që provat e këtij rasti të mbaheshin konfidenciale.

Sipas tij, kjo bëri që Thaçi të shpallej fajtor publikisht për një vrasje, ndërsa provat mbi të cilat është bazuar ky përfundim mbetën jashtë shqyrtimit publik.

Avokati shtoi se z. Thaçi do ta mirëpriste një shqyrtim publik të këtyre provave.

Mbrojtja ka njoftuar se do ta kundërshtojë aktgjykimin edhe për shkak të pretendimeve për shkelje të të drejtave për një proces të rregullt gjyqësor, të garantuara nga Konventa Evropiane për të Drejtat e Njeriut dhe Kushtetuta e Kosovës.

Në deklaratë theksohet se z. Thaçi e mohon shprehimisht çdo përfshirje në vrasje.

Në fund, Misetiq ka nënvizuar se respektimi i standardeve strikte të drejtësisë procedurale është thelbësor për ruajtjen e besimit të publikut në institucionet ndërkombëtare të drejtësisë penale.

Mbrojtja ka paralajmëruar se do ta dorëzojë zyrtarisht njoftimin për apel, duke kërkuar nga Paneli i Apelit korrigjimin e atyre që ajo i quan gabime faktike, juridike dhe procedurale të konstatuara në aktgjykimin e shkallës së parë.