Mirror raporton për dënimin e Hashim Thaçit dhe vendimin e gjykatës

Ish-presidenti i Kosovës, Hashim Thaçi, është shpallur fajtor për krime lufte, mes të cilave vrasje dhe torturë.

Sipas gazetës britanike Mirror, 58-vjeçari është dënuar me 25 vjet burg për katër akuza që lidhen me krime lufte të kryera gjatë përpjekjeve të Kosovës për pavarësi nga Serbia. Thaçi ishte larguar nga posti i tij pothuajse gjashtë vjet më parë për t’u përballur me këto akuza.

Vendimi u dha nga një trup gjykues i Dhomave të Specializuara të Kosovës në Hagë, Holandë. Thaçi u dënua për vrasje, torturë, trajtim mizor dhe ndalim arbitrar, vepra që lidhen me periudhën kur ai shërbente si komandant i lartë i Ushtrisë Çlirimtare të Kosovës (UÇK) gjatë viteve 1990.

I veshur me kostum dhe kravatë, Thaçi qëndroi në heshtje teksa kryetari i trupit gjykues, Charles Smith, shpalli dënimin. Ai ka të drejtë ta apelojë vendimin. Sipas zotit Smith, Thaçi e shfrytëzoi “pozicionin, udhëheqjen, autoritetin dhe qëndrimin e tij” për të nxitur kryerjen e krimeve.

Megjithatë, gjyqtari amerikan theksoi se procesi nuk lidhej me legjitimitetin e Ushtrisë Çlirimtare të Kosovës dhe as me synimin e saj përfundimtar për t’i siguruar Kosovës pavarësinë. Në atë periudhë, Kosova ishte provincë e Serbisë.

Për akuza të ngjashme për krime lufte u gjykuan edhe tre ish-drejtues të tjerë të UÇK-së, të cilët kishin luftuar kundër forcave serbe gjatë luftës së viteve 1998-1999.

Trupi gjykues i liroi të katër të pandehurit nga gjashtë akuza për krime kundër njerëzimit, pasi vlerësoi se prokurorët nuk arritën të dëshmonin se veprat ishin kryer në kuadër të një sulmi të gjerë dhe sistematik kundër civilëve. Për Thaçin dhe tre të pandehurit e tjerë, Kadri Veselin, Rexhep Selimin dhe Jakup Krasniqin, prokurorët kishin kërkuar dënimin maksimal prej 45 vjetësh burg.

Të gjithë të akuzuarit i mohuan pretendimet e ngritura ndaj tyre. Kadri Veseli u dënua me 18 vjet burg, Rexhep Selimi me 13 vjet, ndërsa Jakup Krasniqi me 25 vjet. Që të katër u shpallën fajtorë për krimet e luftës të ndalimit arbitrar dhe të paligjshëm të 385 personave, torturimit të 303 personave, trajtimit mizor të 49 personave dhe vrasjes së 96 kundërshtarëve politikë.