Mimoza Kusari-Lila: Rënia e çmimit të naftës pritet të jetë simbolike, vetëm 1-2 centë

Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka paralajmëruar se qytetarët e Kosovës mund të përjetojnë një lehtësim të vogël në koston e karburanteve në periudhën e ardhshme, por që kjo ulje nuk do të jetë thelbësore.

Gjatë një bisede për Ekonomia Online, ajo sqaroi se importet e fundit kanë regjistruar një zbritje minimale prej një centi dhe nëse ky trend qëndron, atëherë edhe çmimet për konsumatorin do të reflektojnë këtë lëvizje.

“Në qoftë se cikli vijon si dje, në ditët në vazhdim mund të vërejmë një rënie, por ajo nuk është aspak dramatike. Bëhet fjalë për 1 apo 2 centë. Importi i djeshëm ishte 1 cent më i ulët se ditët e mëparshme dhe shpresoj që kjo të vazhdojë, sepse kemi pasur një diferencë gati 20 centëshe me çmimin aktual”, u shpreh Kusari-Lila.

Ajo rikonfirmoi se MINTI po analizon zgjatjen e vendimit për caktimin e një çmimi tavan dhe të një marzhe fikse fitimi për tregtarët e naftës. Sipas saj, kjo ndërhyrje ka shërbyer si mburojë për qytetarët ndaj rritjeve të forta dhe të menjëhershme.

Ministrja në detyrë shpjegoi mekanizmin e aplikimit të masës: “Prej muajit prill, ne përdorim mesataren e 10 milionë litrave të importuar, së cilës i shtojmë marzhën e lejuar. Kjo bën që kur ka ngritje të shpejtë, efekti të zbutet për konsumatorin, sepse merren parasysh edhe importet e ditëve të shkuara. Po ashtu, edhe rënia reflektohet gradualisht. Kjo masë vepron si një stabilizues mes lëkundjeve të forta të tregut”.

Ajo theksoi se duke qenë se Kosova nuk ka kapacitete prodhuese apo rafineri, lëvizjet në bursat ndërkombëtare nuk ndjehen menjëherë në vend.

Sipas Kusari-Lilës, mungesa e kësaj mase do ta çonte çmimin edhe më lart, veçanërisht tani që kërkesa është rritur për shkak të fluksit të veturave gjatë verës. “Në treg të lirë, me ofertë e kërkesë, çmimi do të ishte më i lartë, sepse numri i automjeteve është shtuar nga mërgata. Këtë e shohim edhe te importet. Të dhënat që marrim dy herë në ditë nga Doganat tregojnë këtë tendencë”, shtoi ajo.

Në kuadër të rishikimit të politikës, Kusari-Lila bëri të ditur se po shqyrtohen dy rrugë: ndryshimi i metodologjisë brenda udhëzimit administrativ ekzistues, ose, nëse tregu stabilizohet, heqja e plotë e masës dhe ndjekja e çmimit direkt sipas importit.

Ajo konfirmoi presionin e vazhdueshëm nga shoqatat e naftarëve, të cilët kërkojnë heqjen e marzhës së fitimit, me arsyetimin se rritja e shpenzimeve të tjera, përfshirë pagën minimale, po i dëmton. “Kemi një kërkesë për takim urgjent dhe do t’i takojmë së shpejti. Kjo është një balancë delikate, sepse duhet të mbrojmë edhe qytetarët, pa i rrezikuar operatorët. Po bëjmë vlerësimet duke marrë parasysh si lëvizjet globale, ashtu edhe situatën tonë të brendshme”, përfundoi ajo.