Mërgim Lushtaku për zgjedhjet në PDK: Ende pa vendim për kandidimin, flet edhe për Sami Lushtakun

Deputeti i Partisë Demokratike të Kosovës, Mërgim Lushtaku, nuk e ka mbyllur mundësinë e kandidimit për kryetar të partisë, megjithëse aktualisht anon më shumë nga vendimi për të mos hyrë në garë.

Gjatë emisionit “Intervista e javës” në KosovaPress, ai tha se qytetarë dhe bashkëpartiakë i kanë kërkuar të kandidojë, por se ende nuk ka marrë një vendim përfundimtar. Sipas tij, përpara se të vendosë, do të këshillohet me miq, shokë dhe njerëz të afërt.

Lushtaku u shpreh se kush angazhohet në politikë duhet të ketë ambicie, përfshirë edhe synimin për të drejtuar partinë. Ai e vlerësoi faktin që anëtarë të PDK-së e kanë shpallur tashmë kandidimin, ndërsa për veten tha se nuk ka dhënë as përgjigje pozitive, as negative.

Deputeti kërkoi një reformim më të gjerë të PDK-së dhe ndryshim të mënyrës së zgjedhjes së kryetarit. Ai tha se ka propozuar që çdo anëtar të ketë një votë në këtë proces, duke shtuar se autoriteti i kryetarit të partisë duhet të forcohet.

I pyetur për mundësinë që babai i tij, Sami Lushtaku, të kandidojë për kryetar, deputeti tha se ai gëzon autoritet publik që shkon përtej PDK-së. Ai përmendi rolin e Sami Lushtakut si një ndër themeluesit e UÇK-së, bashkë me Adem Jasharin dhe të tjerë.

Sipas Mërgim Lushtakut, pretendimet se Sami Lushtaku ka pasur ndikim më të madh se vetë kryetari i partisë nuk kanë qenë të vërteta. Ai tha se babai i tij ka qenë me krenari në krah të Hashim Thaçit dhe ka mbështetur secilin kryetar të PDK-së kur është dashur ndihmë në proceset zgjedhore. Nëse Sami Lushtaku do të kishte ambicie për ta drejtuar partinë, shtoi ai, do të hynte në garë.

Deputeti u shpreh gjithashtu se kundërshtarët politikë janë përpjekur ta nxjerrin Sami Lushtakun më shumë në pah për interesat e tyre dhe ta paraqesin negativisht. Ai tha se ndaj babait të tij janë ngritur aktakuza, por se në çdo proces gjyqësor ai ka dalë i pafajshëm.

PDK ka shpallur zgjedhjet e brendshme pas dorëheqjes së ish-kryetarit Bedri Hamza. Aktualisht, detyrën e kryetares së partisë po e ushtron Vlora Çitaku.