Masat ndaj drejtueses së SHISH, Koçeku: Thaçi e emëroi në Kosovë, Kurti e shkarkoi; në Shqipëri e caktoi Rama dhe e arreston SPAK

Deputetja e pavarur Marjana Koçeku ka reaguar pas operacionit të SPAK në kuadër të dosjes “AKSHI”. Me vendim të GJKKO-së, kontrolle janë kryer në disa banesa, mes tyre edhe në banesën e kreut të SHISH, Vlora Hyseni, si dhe në atë të ish-kreut të Policisë, Ilir Proda.

Me kërkesë të SPAK-ut, GJKKO-ja caktoi për Hysenin masën “arrest në shtëpi” dhe “pezullim nga detyra”. Vendimi për arrestin nuk është zbatuar, pasi ajo ndodhet jashtë vendit.

Përmes një reagimi në rrjetet sociale, Koçeku shkroi se Vlora Hyseni ishte emëruar në Kosovë nga Hashim Thaçi, ndërsa më pas ishte shkarkuar nga Albin Kurti. Sipas deputetes, në Shqipëri ajo u emërua nga kryeministri Edi Rama, por tashmë po arrestohet nga SPAK-u. Në postimin e saj, Koçeku shtoi: “asgja me emnin Vlorë nuk i ka punët mirë këto kohë.”

“Vlorën e ka emnu Hashim Thaçi e ka shkarku Albin Kurti e ka emnu Edi Rama, e ka arrestu SPAKU. Asgja me emnin Vlore nuk i ka punët mirë këto kohë.”, ka shkruar deputetja, e cila është larguar nga Grupi Parlamentar i PS-së.