Majko: Vendimi i Hagës nuk e ndryshon historinë, por dëshmon lidhjen e pandashme mes Kosovës dhe Shqipërisë

Ish-kryeministri shqiptar gjatë Luftës së Kosovës, Pandeli Majko, e ka cilësuar verdiktin e sotëm të Gjykatës së Hagës si një vendim dramatik, i cili, sipas tij, nuk mund ta rishkruajë historinë.

Majko e ka përjetuar këtë zhvillim edhe në planin personal. Gjatë viteve të luftës në Kosovë, ai drejtonte qeverinë e Shqipërisë, ndërsa Hashim Thaçi ishte një prej udhëheqësve të UÇK-së dhe anëtar i delegacionit të Kosovës në Rambuje.

Sipas tij, Thaçi ishte në krye të delegacionit të Rambujesë, një proces që për herë të parë e vendosi Kosovën si subjekt të të drejtave ndërkombëtare. Majko e përshkroi atë si luftëtar dhe drejtues, duke theksuar se ndihet krenar që e ka pasur mik dhe se miqësia e tyre do të jetë edhe më e fortë tani.

Duke folur për Top Channel, ish-kryeministri tha se vendimi përbën një dramë të jashtëzakonshme njerëzore. Ai shprehu gjithashtu shqetësimin se, me kalimin e kohës, ky proces mund të ndikojë në mënyrën se si do të perceptohet historikisht lufta e Kosovës.

Majko nënvizoi se vendimi i një gjykate ndërkombëtare nuk e ndryshon të kaluarën, ndërsa pesha që do të marrë në të ardhmen do të varet nga rrethanat. Megjithëse është folur për një rezultat që e nxjerr UÇK-në të pastër, ai tha se ndihet pesimist, pasi, sipas tij, prej disa kohësh po tentohet deformimi i historisë së saj.

Ai shtoi se nuk mund të thuhet se UÇK-ja ka dalë e papërlyer nga kjo histori, pasi mbetet fakt se pjesëtarë të saj janë vrarë ose dënuar. Për Majkon, kjo është një dramë që kërkon të kuptohet dhe të vlerësohet në thellësinë e saj.

Ish-kryeministri u bëri thirrje Kosovës dhe Shqipërisë të reagojnë me dinjitet dhe të mos hyjnë në përplasje me drejtësinë. Duke iu referuar pamjeve pas vendimit, ai tha se njerëz, fëmijë dhe ish-ushtarë të UÇK-së janë parë duke qarë, çka tregon përmasën e jashtëzakonshme njerëzore të kësaj drame.

Majko theksoi se zemërimi ndaj gjykatës dhe fyerjet ndaj një vendimi gjyqësor nuk përbëjnë forcë, por dobësi. Sipas tij, ky zhvillim e ka bërë të qartë se Kosova nuk ka tjetër përveç Shqipërisë dhe Shqipëria nuk ka tjetër përveç Kosovës.

Ai kujtoi se beteja ligjore nuk ka përfunduar, pasi tashmë mbetet edhe faza e Apelit. Për këtë arsye, Majko kërkoi që çështja të mos shihet vetëm si një goditje ndaj individëve të dënuar, por si një akt që ka prekur të gjithë, duke vënë në dukje se gjatë luftës është e vështirë të ndahet përgjegjësia personale nga ajo kolektive.

Gjykata Speciale u themelua në vitin 2015 nga Kuvendi i Kosovës, pas ndryshimeve kushtetuese dhe marrëveshjeve të arritura me Bashkimin Evropian. Majko e konsideroi pranimin e saj një çmim që Kosova zgjodhi ta paguante në rrugën drejt konsolidimit të saj ndërkombëtar.

Sipas tij, krijimi i kësaj gjykate kërkonte një nivel të caktuar guximi dhe nuk mund të përdoret si bazë për akuza ndaj Kosovës në planin ndërkombëtar apo historik. Majko tha se ndërgjegjja e shqiptarëve e di se gjithçka është paguar ose me vrasje, ose me burgosje, duke shtuar se ata nuk i zhgënjyen.