Largohuni ose do të ndërhyjmë me forcë” – Apeli i policisë pranë Gjykatës Speciale në prag të vendimit për ish-udhëheqësit e UÇK-së

Kanë mbetur vetëm pak orë deri në shpalljen e vendimit gjyqësor për ish-udhëheqësit e Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi, teksa masat e sigurisë në Hagë janë përforcuar ndjeshëm.

Forcat e rendit që mbikëqyrin zonën përreth Gjykatës Speciale në Hagë u kanë drejtuar një paralajmërim qytetarëve që ndodhen aty, duke i urdhëruar të largohen nga godina.

Nëpërmjet një komunikimi me altoparlant, autoritetet kanë bërë të ditur se në rast mosrespektimi të këtij urdhri, do të jenë të detyruara të aplikojnë masa shtrënguese.

“Policia ju urdhëron të largoheni nga ndërtesa e Tribunalit. Në të kundërt, do të ushtrojmë forcë,” ishte formulimi i saktë i mesazhit zyrtar.

Këto zhvillime po ndodhin në momentet që i paraprijnë leximit të aktgjykimit për Thaçin, Veselin, Selimin dhe Krasniqin.

Sipas njoftimit të Dhomave të Specializuara të Kosovës, seanca ku do të bëhet i ditur vendimi është planifikuar për ditën e sotme, 16 shtator, duke filluar nga ora 10:00 me orën lokale të Hagës. Seanca do të jetë e hapur për publikun dhe do të transmetohet gjithashtu përmes internetit.

Të katër ish-komandantët e UÇK-së përballen me pretendime për krime lufte dhe krime kundër njerëzimit. Ata i kanë hedhur poshtë kategorikisht këto akuza, duke u shprehur të pafajshëm.

Telegrafi po mbulon drejtpërdrejt nga Haga të gjitha ngjarjet para dhe gjatë procesit të shpalljes së aktgjykimit.