Kuvendi i Kosovës nuk konstituohet, seanca shtyhet për të shtunën

Seanca për konstituimin e Kuvendit të Kosovës do të rifillojë të shtunën në orën 11:00, edhe pse afati 30-ditor i vendosur nga Gjykata Kushtetuese për përmbylljen e procesit përfundon të premten në mesnatë.

Kryesuesi i seancës, Avni Dehari, vendosi shtyrjen e mbledhjes pasi ajo e së enjtes nuk arriti të përfundojë. Vendimi u mor pas kërkesës së kryeministrit në detyrë dhe liderit të Lëvizjes Vetëvendosje, Albin Kurti, për t’u dhënë më shumë kohë negociatave politike mbi krijimin e institucioneve të reja.

Seanca e radhës u njoftua disa orë pas takimit të radhës ndërmjet Kurtit dhe kryetarit të Lidhjes Demokratike të Kosovës, Lumir Abdixhiku. Bisedimet përfunduan pa marrëveshje për zhbllokimin e situatës politike.

Partia Demokratike e Kosovës e ka kundërshtuar shtyrjen, duke e konsideruar atë shkelje të vendimit të Gjykatës Kushtetuese dhe një precedent të rrezikshëm për funksionimin e shtetit ligjor.

Shqetësime për tejkalimin e afatit kanë shprehur edhe ekspertët e fushës kushtetuese. Eugen Cakolli nga Instituti Demokratik i Kosovës e ka përshkruar vendimin si “shkelje të hapur dhe cenim të drejtpërdrejtë të rendit kushtetues”.

Nuk dihet ende nëse deputetët e opozitës do të jenë të pranishëm në seancën e së shtunës. Ndërkohë, negociatat mes partive kryesore për arritjen e një marrëveshjeje politike vazhdojnë, por pa rezultat.