Kurti: Zhvillimi rural do të shërbejë si bazë për transformimin e bujqësisë në Kosovë

Kryeministri i Kosovës, Albin Kurti, mori pjesë në Konferencën XXII të Rrjetit Evropian për Zhvillimin Rural, që zhvillohet në Mitrovicë nga 29 shtatori deri më 1 tetor. Organizimin e këtij aktiviteti e ka bërë Kolegji Publik Ndërkombëtar i Biznesit Mitrovica (IBCM), në bashkëpunim me Rrjetin Evropian për Zhvillimin Rural.

Gjatë fjalimit të tij, Kurti vuri në pah rëndësinë që ka zhvillimi i zonave rurale për Kosovën. Ai përmendi tokat pjellore, pasuritë natyrore, traditën në bujqësi dhe potencialin njerëzor si disa prej përparësive të vendit.

Sipas kryeministrit, një numër i madh qytetarësh jetojnë në hapësira rurale, ndërsa bujqësia, blegtoria, përpunimi i produkteve ushqimore dhe bizneset e vogla në këto zona sigurojnë të ardhura të rëndësishme për shumë familje.

Kurti deklaroi se Qeveria po orienton investime drejt bujqësisë dhe zhvillimit rural, duke synuar ndryshimin e modelit aktual të mbështetjes. Sipas tij, sektori duhet të mos mbështetet kryesisht vetëm në sipërfaqen e tokës dhe numrin e krerëve, por të fokusohet te prodhimi, cilësia, rritja e produktivitetit dhe konkurrueshmëria.

“Përkundër vështirësive, nga sfidat strukturore e deri te ndryshimet klimatike, synimi ynë është që, përveçse ta mbështesim, ta transformojmë bujqësinë”, u shpreh Kurti.

Ai nënvizoi se nevojiten investime në ujë dhe sisteme ujitjeje, në ruajtjen e shëndetit të tokës, si dhe në infrastrukturën për përpunim e magazinim. Këto masa, sipas tij, do t’u jepnin fermerëve mundësinë të rrisnin vlerën e produkteve të tyre, duke shmangur eksportin e lëndëve të papërpunuara dhe importin e produkteve të gatshme.

Kreu i Qeverisë e cilësoi gjithashtu të domosdoshëm ndërtimin e një sistemi ushqimor të mbështetur te siguria e konsumatorëve, konkurrenca e drejtë në treg dhe besimi i qytetarëve te institucionet publike.

“Fshati i zhvilluar dhe bujqësia produktive janë parakusht i shtetit të fortë dhe ekonomisë së qëndrueshme, sikurse shoqëria e shëndoshë kërkon sistem ushqimor të sigurt”, përfundoi Kurti.