Kurti pret takim konstruktiv me Hamzën, kreu i PDK-së kërkon fokus te prioritetet

Lideri i Lëvizjes Vetëvendosje, Albin Kurti, do të mbajë sot takime të ndara me kryetarin e Partisë Demokratike të Kosovës, Bedri Hamza, dhe me kryetarin e Lidhjes Demokratike të Kosovës, Lumir Abdixhiku, në kuadër të konsultimeve për krijimin e institucioneve të reja të vendit.

Takimi me Hamzën është caktuar për në orën 09:00, ndërsa ai me Abdixhikun në orën 18:00, dhe të dyja do të zhvillohen në Kuvendin e Kosovës.

Këto takime pasojnë letrën që Kurti ua ka dërguar kryetarëve të PDK-së, LDK-së dhe Aleancës për Ardhmërinë e Kosovës për t’u takuar, gjë e konfirmuar nga zëdhënësi i Qeverisë, Fatlum Jashari. Ftesat janë nisur një ditë pasi KQZ certifikoi rezultatet e zgjedhjeve parlamentare të 7 qershorit.

KQZ certifikoi rezultatet e zgjedhjeve të 7 qershorit të mërkurën. Nga këto zgjedhje, parti e parë ka dalë Lëvizja Vetëvendosje me 47.13%, apo 53 ulëse në Kuvend. E dyta, Partia Demokratike e Kosovës, me 19.44%, apo 22 deputetë. Ndërkaq, Lidhja Demokratike e Kosovës, me 16.69%, ka fituar 18 ulëse, si dhe Aleanca, me 6.74%, shtatë ulëse. Kurse komunitetet joshumicë kanë siguruar 20 ulëse.

Kurti ka mbërritur në Kuvend i shoqëruar nga ministri në detyrë i Financave, Hekuran Murati, për takimin me kryetarin e PDK-së, Bedri Hamza.

Para fillimit të takimit, Kurti tha se pret që biseda me Hamzën të zhvillohet në frymë konstruktive.

“Presim që takimi të jetë konstruktiv dhe t’i konstituojmë institucionet e legjislatures së 11-të”, tha Kurti.

Ky është takimi i parë i Kurtit me krerët e partive politike pas certifikimit të rezultateve nga KQZ-ja.

Nga ana tjetër, kryetari i PDK-së, Bedri Hamza, tha pak para takimit me liderin e Lëvizjes Vetëvendosje në Kuvendin e Kosovës se fillimisht duhet të flitet për prioritete dhe jo për pozita.

I pyetur nëse do të gjendet një zgjidhje për formimin e institucioneve të reja, Hamza përmendi partneritetin me aleatët, si edhe rritjen e pagave dhe pensioneve.

“Fillimisht për prioritete se unë kam garuar me një program dhe kam garuar me disa prioritete. Nuk kam garuar për me i pas katër-pesë vetëm ministra, për me pas këtë dhe atë pozicion. Kam garuar me pas ambient të mirë për biznesin, me pas partneritet me aleatë dhe miqtë tanë dhe me i rrit pagat dhe pensionet”, tha ai.

Kurti të premten ka ftuar në takim edhe kryetarin e LDK-së, Lumir Abdixhiku, dhe kryetarin e Aleancës, Ardian Gjini.

Ky i fundit ka refuzuar takimin, derisa ka përmendur disa prej kërkesave të tij, përfshirë gazin amerikan për ta bërë kuorumin për presidentin.