Kurti paralajmëron para vendimit për ish-udhëheqësit e UÇK-së: “Asnjë trupë gjykuese nuk mund ta errësojë luftën për liri

Në prag të shpalljes së aktgjykimit për katër ish-drejtuesit e Ushtrisë Çlirimtare të Kosovës, Hashim Thaçi, Jakup Krasniqi, Rexhep Selimi dhe Kadri Veseli, kryeministri Albin Kurti ka pranuar se popullata po përjeton ditë tensioni dhe shqetësimi të thellë.

Ai e ka quajtur pretendimin e Prokurorisë si “të pabazuar dhe të paimagjinueshëm”, duke argumentuar se bie ndesh me realitetin historik të popullit kosovar dhe me vetë drejtësinë e rezistencës çlirimtare.

Kurti ritheksoi se qëndrimi i ekzekutivit që ai drejton mbetet i palëkundur dhe pa ekuivoke, duke nënvizuar faktin se mbi civilët shqiptarë në Kosovë janë ushtruar krime kundër njerëzimit, krime lufte dhe gjenocid.

Sipas kryeministrit, përgjegjësia për këto mizori bie mbi aparatin shtetëror të Jugosllavisë së atëhershme serbe, nën udhëheqjen e Sllobodan Millosheviqit.

Në mbyllje të deklaratës së tij, kreu i qeverisë dha një qëndrim kategorik në përkrahje të UÇK-së:

“Asnjë instancë gjyqësore, qoftë vendase apo ndërkombëtare, nuk mund ta njollosë Ushtrinë Çlirimtare të Kosovës.”