Kurti: Pa marrëveshje për presidentin, konstituimi i Kuvendit mund të çojë në shpërndarjen e tij

Pas ndërprerjes së seancës konstituive të Kuvendit të Kosovës, kryeministri në detyrë dhe kryetari i Lëvizjes Vetëvendosje, Albin Kurti, deklaroi se fillimisht duhet të arrihet një marrëveshje politike për zgjedhjen e presidentit ose presidentes së re.

Sipas Kurtit, vazhdimi i konstituimit të Kuvendit pa u zgjidhur çështja e presidentit do të krijonte terrenin për shpërndarjen e këtij institucioni.

“Ne duam t’i japim hapësirë dialogut politik dhe mundësisë për të arritur një marrëveshje për presidentin apo presidenten e re. Çdo konstituim i Kuvendit pa një marrëveshje për këtë çështje, në praktikë, do të ishte parapërgatitje për shpërndarjen e Kuvendit”, tha Kurti më 06.08.2026, pas ndërprerjes së seancës.

Ai theksoi se dialogu politik mbetet rruga e vetme për konsolidimin e plotë të institucioneve, duke iu referuar edhe rezultatit të zgjedhjeve të 7 qershorit.

Kurti u shpreh se krijimi i mundësisë për bisedime dhe arritja e një marrëveshjeje politike është zgjidhja e duhur për konstituimin e plotë të institucioneve, në përputhje me rendin dhe vullnetin e shprehur nga qytetarët në zgjedhjet e lira e demokratike.

Kreu i Vetëvendosjes bëri të ditur se partia e tij, që prej publikimit të rezultateve zgjedhore, ka kërkuar nisjen e diskutimeve me partitë politike.

Ai tha se po i ndërmerr vetë nismat për takime lidhur me situatën politike, ndërsa konfirmoi se komunikimi me kryetarin e LDK-së, Lumir Abdixhikun, po zhvillohet drejtpërdrejt dhe pa ndërmjetësues.

Kurti deklaroi se drejtuesit e LDK-së dhe deputetë të kësaj partie kanë kërkuar publikisht që palët të merren vesh për të gjitha çështjet. Ai kujtoi se gjatë pranverës ishte kritikuar për zgjedhjen e kryetarit të Kuvendit dhe të qeverisë pa zhvilluar më parë takime me ta.

“I kam mbajtur shënim të gjitha kritikat që na janë bërë në pranverë. Kemi reflektuar dhe këtë herë po veprojmë ndryshe: nuk po konstituojmë asnjë institucion pa u takuar, ashtu siç na është kërkuar. Të gjitha nismat për takime po i marr unë, sepse dua bashkëpunim”, tha ai.

Kurti shtoi se takimet me LDK-në tashmë nuk përbëjnë lajm, ndërsa një takim me PDK-në dhe AAK-në do të ishte lajm.

Më herët, ishte njoftuar se Kurti do të mbante konferencë për media në orën 12:30, në Kuvendin e Kosovës, menjëherë pas shtyrjes së seancës konstituive. Seanca u ndërpre pasi ai kërkoi kohë shtesë për vijimin e diskutimeve me partitë parlamentare rreth marrëveshjes për zgjedhjen e presidentit të vendit.

Konferenca pritej të trajtonte zhvillimet e fundit politike, arsyet e shtyrjes së seancës dhe hapat e mëtejshëm drejt formimit të institucioneve të reja.