Në momentin e zgjedhjes së Osmanit si presidente e vendit u arrit edhe konstituimi i të gjitha institucioneve të reja të Kosovës.
Të lidhura
None found
Ditë më parë u arrit të konstituohet edhe Kuvendi i Kosovës me kryetarin e ri Glauk Konjufca si dhe Qeveria e re e Kosovë nën drejtimin e Albin Kurtit nga Lëvizja Vetëvendosje.
E pas zgjedhjes së Vjosa Osmanit si presidente e re e vendit, nga Bashkimi Evropian kanë deklaruar se e mirëpresin zgjedhjen e saj në krye të presidencës duke e uruar për postin e saj të ri.
Në një përgjigje të dhënë për lajmi.net, zëdhënësi i Bashkimit Evropian Peter Stano, ka deklaruar se Kosova tani ka mundësinë të përqendrohet me vendosmëri në punët e rëndësishme që ka përpara.
“Përfshirë këtu shtyrjen përpara të reformave të lidhura me Bashkimin Evropian dhe dialogun e lehtësuar nga BE-ja”, tha ai.
I pyetur nëse nga Bashkimi Evropian është e caktuar ndonjë datë që ka të bëjë me rifillimin e dialogut Kosovë-Serbi, Stano tha se do të shpallin takimin e ardhshëm kur të shohin se është e përshtatshme.
“Ne do të shpallim takimin e ardhshëm kur është e përshtatshme. Bashkimi Evropian do të vazhdojë të angazhohet me autoritetet, me synimin për të mbështetur Kosovën në arritjen e progresit të prekshëm në rrugën e saj evropiane”u tha tutje në përgjigjen e BE-së.
Gjithashtu u theksua se do të kërkojë që Kosova të përparojë në reformat e dala nga Marrëveshja e Stabilizim Asociimit dhe Agjendat e Reformës Evropiane, në kuadër të bashkëpunimit rajonal.
“Kjo do të kërkojë që Kosova të përparojë në reformat e udhëhequra nga Marrëveshja e Stabilizim-Asociimit dhe Agjenda e Reformës Evropiane, si dhe në bashkëpunimin rajonal. Rruga evropiane e Kosovës gjithashtu kalon përmes normalizimit gjithëpërfshirës të marrëdhënieve me Serbinë”, tha Stano.
Poashtu u ritheksua fakti se në këtë drejtim, Bashkimi Evropian dhe shtetet e saj anëtare presin që autoritetet e reja në Prishtinë të angazhohen në mënyrë konstruktive me qëllim vazhdimin e takimeve të dialogut dhe në mënyrë që të shfrytëzojnë mundësinë që kanë përpara për të sjellë këtë proces të lehtësuar nga BE-ja në një përfundim të suksesshëm.
“Në këtë drejtim, BE dhe shtetet e saj anëtare presin që autoritetet e reja në Prishtinë të angazhohen në mënyrë konstruktive me qëllim vazhdimin e takimeve të Dialogut të lehtësuar nga BE dhe të shfrytëzojnë mundësinë përpara tyre për ta sjellë këtë proces të rëndësishëm në një përfundim të suksesshëm”.
Duhet përkujtuar që dialogu Kosovë-Serbi pati disa ndërprerje radhazi, si fillim për shkak të vendosjes së taksës 100% asokohe nga kryeministri i vendit, Ramush Haradinaj e më pas për shkak të zhvillimeve politiko-institucionale në vend.
Pas fitores që pati në zgjedhjet e 14 shkurtit, kryeministri i ri i Kosovës, Albin Kurti pati deklaruar se dialogu Kosovë-Serbi nuk është në top-prioritetet e tij. Madje një gjë të tillë ai e pati deklaruar hapur edhe pas takimit që pati me e përfaqësuesin e posaçëm të Bashkimit Evropian për dialogun Kosovë-Serbi, Mirosllav Lajçak.
“Nuk do ta kemi prioritet formimin e ekipit të dialogut me Serbinë. Të gjitha matjet e opinionit publik, dialogu me Serbinë është herë në vendin e gjashtë e herë në vendin e shtatë. Neve na kanë zgjedhur këta qytetarë, ne ju përgjigjemi atyre. Prioritet e kemi drejtësinë dhe punësimin”, pati deklaruar Albin Kurti.