Kryeprokurorja e Speciales përshëndet aktgjykimin: UÇK-ja dhe lufta për pavarësi nuk ishin objekt i ndjekjes penale

Prokurorja e Specializuar Kimberly West e ka cilësuar aktgjykimin e shpallur sot ndaj Hashim Thaçit, Kadri Veselit, Rexhep Selimit dhe Jakup Krasniqit si një vendim me rëndësi për sundimin e ligjit në Kosovë dhe për drejtësinë e vonuar ndaj viktimave.

Gjykata vendosi se të katër të akuzuarit kanë përgjegjësi penale individuale për krimet e luftës që lidhen me arrestimin dhe ndalimin e paligjshëm ose arbitrar, trajtimin mizor, torturën dhe vrasjen e paligjshme.

Sipas vendimit, Hashim Thaçi u dënua me 25 vjet burgim, Kadri Veseli me 18 vjet, Rexhep Selimi me 13 vjet, ndërsa Jakup Krasniqi me 25 vjet.

“Aktgjykimi i sotëm, i mbështetur vetëm në fakte dhe në ligj, përbën një hap të rëndësishëm drejt përgjegjësisë dhe forcimit të sundimit të ligjit në Kosovë”, deklaroi Prokurorja e Specializuar. Ajo shtoi se gjykata ka vërtetuar se asnjë person, pavarësisht pozitës apo autoritetit politik, nuk qëndron mbi ligjin dhe nuk gëzon imunitet përballë përgjegjësisë për krime të rënda ndërkombëtare.

Kimberly West nënvizoi se çështja e ngritur nga ZPS-ja kishte në qendër përgjegjësinë penale të individëve dhe nuk synonte të vinte në pikëpyetje ndonjë narrativë historike.

“Në përputhje me mandatin e saj, ZPS-ja ka kërkuar të mbajë përgjegjës individët për veprimet e tyre, asgjë më shumë”, tha më tej Znj. Uest. “ZPS-ja nuk ka ndjekur penalisht Ushtrinë Çlirimtare të Kosovës dhe as luftën e zhvilluar për pavarësinë e Kosovës.”

“Persona të caktuar i shfrytëzuan rrethanat e luftës për të kryer krime të rënda, ndaj është në të mirë të Kosovës që ata tani të përballen me përgjegjësinë”, vijoi ajo.

Gjatë paraqitjes së çështjes së saj, ZPS-ja solli në sallën e gjyqit 125 dëshmitarë, të cilët dëshmuan drejtpërdrejt, si dhe dorëzoi rreth 3 000 prova materiale në shumë gjuhë.

Në aktgjykim, trupi gjykues arriti në përfundimin se Thaçi, Veseli, Selimi dhe Krasniqi ishin fajtorë për arrestimin dhe ndalimin e paligjshëm ose arbitrar të të paktën 385 personave, për trajtim mizor ndaj të paktën 49 personave, për torturë ndaj 303 personave dhe për vrasje të paligjshme të të paktën 96 personave.

Veprat penale prekën qindra civilë dhe persona që nuk merrnin pjesë në luftime. Ato u kryen nga prilli i vitit 1998 deri më 20 qershor të vitit 1999, në komuna të ndryshme të Kosovës dhe në dy rrethe të Shqipërisë veriore.

Prokurorja e Specializuar bëri të ditur gjithashtu se Zyra e ZPS-së do ta analizojë me kujdes të gjithë aktgjykimin gjatë ditëve në vijim, duke përfshirë edhe gjashtë pikat e aktakuzës për krime kundër njerëzimit, për të cilat nuk pati dënime.