Kryeprokurori Zejnulla Gashi arrin marrëveshje me Institutin e Bazelit për kthimin e pasurive të paligjshme

Kryeprokurori i Shtetit, Zejnulla Gashi, ka formalizuar një marrëveshje bashkëpunimi me Institutin e Bazelit për Qeverisje (IBQ) dhe Qendrën Ndërkombëtare për Rikthimin e Pasurive (ICAR), e cila synon kthimin në Republikën e Kosovës të pasurive të përfituara në mënyrë të paligjshme.

Marrëveshja është nënshkruar në mënyrë elektronike me drejtoreshën Ekzekutive të IBQ-së, Elizabeth Andersen, si dhe me drejtorin e ICAR-it, Iker Lekuona. Sipas komunikatës për media, bashkëpunimi do të përqendrohet në rikthimin dhe riatdhesimin e pasurive që ndodhen jashtë vendit dhe që janë krijuar përmes korrupsionit apo formave të tjera të keqpërdorimit të pushtetit.

Dokumenti parashikon lehtësimin e bashkëpunimit me autoritetet e shteteve të tjera për lokalizimin, identifikimin dhe ndjekjen e pasurive të paligjshme. Prokurori i Shtetit vlerëson se kjo do të rrisë efikasitetin në luftën kundër korrupsionit, pastrimit të parave dhe krimit të organizuar.

Në kuadër të marrëveshjes, Instituti i Bazelit për Qeverisje do t’i japë Prokurorit të Shtetit asistencë strategjike dhe profesionale për procedurat e sekuestrimit dhe konfiskimit të pasurive të paligjshme, duke u mbështetur në standardet dhe praktikat më të mira të bashkëpunimit ndërkombëtar.