Kosova zgjeron raportimin për luftën kundër pastrimit të parave, çfarë përcakton udhëzimi i ri

Kosova ka zgjeruar kërkesat për raportimin e kapaciteteve institucionale dhe financiare të përfshira në parandalimin e pastrimit të parave dhe financimit të terrorizmit.

Ministria e Financave, e drejtuar nga Hekuran Murati, ka nxjerrë Udhëzimin Administrativ Nr. 03/2026, përmes të cilit ndryshohet dhe plotësohet udhëzimi i vitit 2018 për vlerësimin e rrezikut kombëtar nga këto veprimtari.

Dokumenti zyrtar, i siguruar nga KosovaPress, zgjeron informacionin që duhet të raportohet për strukturën institucionale dhe procedurat e përdorura për parandalimin e pastrimit të parave dhe financimit të terrorizmit.

Raportimi përfshin Njësinë e Inteligjencës Financiare, autoritetet tatimore dhe prokuroritë, si edhe të dhënat për burimet njerëzore e financiare të caktuara për këtë fushë. Këto informacione, bashkë me procedurat e përgjithshme të institucioneve përgjegjëse, duhet të jepen për aq sa janë në dispozicion.

Udhëzimi kërkon gjithashtu të raportohet për përpjekjet në nivel kombëtar dhe resurset e angazhuara për këtë qëllim. Konkretisht, nenit 4 të udhëzimit ekzistues i shtohen 2 paragrafë që parashikojnë raportimin e burimeve njerëzore dhe të buxhetit të alokuar për luftën kundër pastrimit të parave dhe financimit të terrorizmit.

Me këto ndryshime synohet që vlerësimi i rrezikut kombëtar të përmbajë më shumë të dhëna dhe të japë një pasqyrë më të plotë të organizimit institucional dhe kapaciteteve në këtë fushë. Ato janë pjesë e plotësimit të kornizës ligjore dhe institucionale për vlerësimin e rreziqeve që lidhen me pastrimin e parave dhe financimin e terrorizmit.

Sipas dokumentit, udhëzimi i ri transpozon plotësisht Direktivën e Bashkimit Evropian 2015/849, të ndryshuar me Direktivën 2018/843, për parandalimin e përdorimit të sistemit financiar për pastrimin e parave dhe financimin e terrorizmit.

Udhëzimi Administrativ Nr. 03/2026 hyn në fuqi ditën kur publikohet në Gazetën Zyrtare të Republikës së Kosovës.