Kosova shpall “non grata” ministren serbe: Mjaft me gjuhën e spastrimit etnik

Ministri i Punëve të Brendshme në detyrë i Kosovës, Xhelal Sveçla, njoftoi se Snezhana Paunoviq, ministre e Administratës Publike dhe Vetëqeverisjes Lokale të Serbisë, është shpallur person i padëshiruar dhe i është ndaluar përgjithmonë kalimi dhe qëndrimi në territorin e Kosovës.

Masa erdhi pasi Paunoviq deklaroi ditë më parë se gjatë vitit 1998 do të kishte kryer një spastrim etnik në Kosovë.

Sveçla theksoi se këto shprehje tregojnë që Serbia vazhdon të jetë e lidhur me ideologjinë e pastrimit etnik ndaj shqiptarëve, duke iu referuar edhe periudhës së ish-presidentit Sllobodan Millosheviq. Ai shtoi se institucionet e Kosovës do të reagojnë me vendosmëri ndaj çdo kërcënimi që cenon sigurinë, sovranitetin dhe rregullin kushtetues të vendit.

Analisti politik Artan Nimani e cilësoi vendimin si të drejtë dhe të nevojshëm. Në një prononcim për “Bota sot”, ai u shpreh se deklaratat që justifikojnë spastrimin etnik nuk janë thjesht provokime politike, por përbëjnë një kërcënim për paqen dhe bashkëjetesën.

Nimani shtoi se Kosova, si shtet sovran, ka jo vetëm të drejtë por edhe detyrim të mbrojë dinjitetin e vet dhe qytetarët e saj, duke kërkuar që e gjithë shoqëria të ngrejë zërin kundër narrativave që përpiqen të relativizojnë krimet e së kaluarës.

“Kjo masë është e merituar dhe e domosdoshme. Tashmë duhet t’i jepet fund përfundimisht retorikës dhe mentalitetit politik që e trajton Kosovën me sytë e viteve ’90 dhe kërkon të arsyetojë krimet e pastrimit etnik. Fjalë të tilla nuk përbëjnë vetëm provokime të natyrës politike, por godasin themelet mbi të cilat janë ngritur paqja dhe bashkëjetesa. Si shtet sovran, Kosova ka jo vetëm të drejtë, por edhe detyrim të ruajë dinjitetin e vet shtetëror dhe qytetarët e saj. Në këtë kontekst, heshtja nuk duhet të jetë qëndrimi i politikës. Mbarë shoqëria, përfshirë akademinë, mediat dhe institucionet, duhet të flasë kundër këtij diskursi të rrezikshëm, i cili orvatet të zbehë dhimbjet e të shkuarës dhe të rrezikojë të ardhmen tonë. Përballë urrejtjes dhe mohimit, përgjigjja jonë duhet të jetë e prerë: mbrojtje e palëkundur e shtetit, e së vërtetës historike dhe e parimeve demokratike,” – deklaroi ai për “Bota sot”.