Kosova kërkon nga BE-ja reagim më të ashpër ndaj deklaratës së ministres serbe për “spastrim etnik”

Qeveria e Kosovës ka kërkuar që Bashkimi Evropian të shkojë përtej reagimit fillestar, të cilin e vlerëson si të “kufizuar dhe të vonuar”, në dënimin e deklaratës së ministres serbe Snezhana Paunoviq lidhur me “spastrimin etnik” në Kosovë.

Ministrja serbe për Administratë Publike dhe Vetëqeverisje Lokale deklaroi fundjavën e kaluar për televizionin serb Kurir se, nëse do të kishte qenë në pozitën e ish-liderit serb Sllobodan Millosheviq gjatë vitit 1998, “do ta kishte spastruar etnikisht Kosovën”.

Pas kësaj deklarate pati reagime të shumta. Kosova ka ngritur tashmë padi kundër Paunoviqit dhe i ka ndaluar përgjithmonë hyrjen në territorin e saj.

Të shtunën, Qeveria e Kosovës bëri të ditur se zëvendëskryeministri i parë dhe ministri i Jashtëm, Glauk Konjufca, i ka dërguar një letër përfaqësueses së lartë të BE-së, Kaja Kallas. Përmes saj, ai ka kërkuar një përgjigje më të fortë nga blloku evropian, ku synojnë anëtarësimin si Kosova, ashtu edhe Serbia.

Në letrën e datës 16 korrik, Qeveria e Kosovës i kërkon BE-së “që t’i dënojë qartë dhe publikisht deklaratat e ministres Paunoviq, t’ua bëjë të qartë autoriteteve serbe se një retorikë e tillë është e papranueshme dhe në kundërshtim me vlerat evropiane, si dhe ta trajtojë këtë çështje seriozisht në kuadër të dialogut politik dhe procesit të anëtarësimit të Serbisë në BE”.

Bashkimi Evropian e ka dënuar tashmë deklaratën e Paunoviqit. Të enjten, komisionarja për Zgjerim, Marta Kos, e përsëriti këtë qëndrim dhe tha se e kishte befasuar fakti që ajo vijon të jetë ministre në Qeverinë serbe.

“Nuk do ta përsëris as atë që ajo tha. Ishte vërtet tronditëse të dëgjohej një deklaratë e tillë. Nuk mund ta imagjinoj që një ministre, pas një deklarate të tillë publike, të mund të vazhdojë të ushtrojë detyrën e saj”, u shpreh Kos të enjten.

Në Serbi, presidenti Aleksandar Vuçiq deklaroi se fjalët e Paunoviqit “nuk pasqyrojnë vullnetin tim, e as të Qeverisë së Serbisë”. Ai shtoi se “politika e shtetit serb është dialogu, e jo kurrë spastrimi etnik”.

Paunoviq, e cila është nënkryetare e Partisë Socialiste të Serbisë, partisë së dikurshme të Millosheviqit, nuk i ka tërhequr deklaratat. Megjithatë, më 16 korrik ajo tha se fjalët e saj “janë nxjerrë jashtë kontekstit” dhe u kërkoi falje Vuçiqit dhe Qeverisë së Serbisë për reagimet që ato shkaktuan.

Në të njëjtën kohë, Shaip Kamberi, deputeti i vetëm shqiptar në Kuvendin e Serbisë, njoftoi të enjten se 53 deputetë të opozitës i kanë paraqitur kryeministrit serb, Gjuro Macut, kërkesë për shkarkimin e Paunoviqit.

Deputetët i kërkuan Macutit që “pa asnjë vonesë” t’ia propozojë Kuvendit të Serbisë shkarkimin e saj.

Mbetet e paqartë nëse kryeministri Macut do të paraqesë një propozim të tillë në Kuvendin serb me 250 vende.

Vëzhgues nga Kosova dhe Serbia i thanë Radios Evropa e Lirë se deklarata e Paunoviqit përbën pjesë të një modeli të politikës serbe ndaj Kosovës. Sipas tyre, bashkësia ndërkombëtare nuk duhet të kufizohet te reagimet, por duhet të ndërmarrë masa konkrete ndaj Serbisë.

Fjalët e saj rikthejnë plagë të vjetra në Kosovë, ku gjatë luftës së viteve 1998-1999 u dëbuan qindra mijëra civilë shqiptarë.

Në atë luftë humbën jetën mbi 13.000 civilë, kryesisht shqiptarë, ndërsa mijëra persona të tjerë u zhdukën.

Mbi 1.500 persona, shumica prej tyre shqiptarë, vazhdojnë të jenë të zhdukur.

Tribunali Penal Ndërkombëtar për ish-Jugosllavinë në Hagë i vlerësoi drejtuesit e atëhershëm të RFJ-së si pjesëmarrës kyç në një “ndërmarrje të përbashkët kriminale”, e cila synonte dëbimin me forcë të qindra mijëra civilëve shqiptarë nga Kosova më 1999.

Sipas aktgjykimeve, synimi ishte “ndryshimi i balancës etnike për të ruajtur kontrollin serb mbi Kosovën”.

Sllobodan Millosheviq, i akuzuari kryesor, vdiq në paraburgim përpara përfundimit të procesit gjyqësor, ndërsa Millan Millutinoviq, ish-president i Serbisë, u shpall i pafajshëm.