Konjufca në OKB: Serbia vrau 12 mijë shqiptarë të pafajshëm, ndërsa Gjuriqi nuk tha asgjë

Zëvendëskryeministri dhe ministri i Punëve të Jashtme të Kosovës, Glauk Konjufca, e kritikoi ministrin e Jashtëm të Serbisë, Marko Gjuriq, në seancën e Këshillit të Sigurimit të OKB-së. Konjufca tha se Serbia ka vrarë në Kosovë 12 mijë njerëz të paarmatosur e të pafajshëm, ndërsa Gjuriqi nuk foli për krimet e kryera nga Serbia.

“Nën flamurin e saj, Serbia ka vrarë në vendin tim 12 mijë shqiptarë të pafajshëm dhe të paarmatosur. Ministri Gjuriq nuk tha asnjë fjalë për ta. Për mua, kjo është mohim i drejtësisë: ai i mohoi këto krime, ndonëse shteti i tij kreu të gjitha këto masakra”, deklaroi Konjufca.

Gjatë fjalës së tij, Konjufca komentoi edhe vendimin e fundit të Dhomave të Specializuara, të cilat shpallën fajtorë katër ish-krerë të Ushtrisë Çlirimtare të Kosovës. Ai vuri në dukje se, edhe pse është theksuar që UÇK-ja nuk po gjykohet dhe se vendimi nuk synon të ulë rëndësinë e luftës çlirimtare, dënimet e rënda mbeten shqetësim serioz për Kosovën.

“Vlerësojmë se vendimi ka gabime në përmbajtje dhe në trajtimin e fakteve. Presim që ato të ndreqen në Apel”, u shpreh Konjufca, duke shtuar se Kosova do të angazhohet për korrigjimin e padrejtësisë në atë shkallë.

Ai i bëri thirrje Serbisë të mos e pengojë Kosovën të anëtarësohet në organizatat ndërkombëtare dhe ta pranojë njohjen e ndërsjellë si themel të marrëdhënieve mes dy vendeve. Konjufca theksoi se sovraniteti i Republikës së Kosovës nuk mund të negociohet. Në fjalën e tij përmendi gjithashtu diskriminimin ndaj shqiptarëve në Luginën e Preshevës dhe veprimet që i cilësoi si destruktive të Serbisë, përfshirë sabotimin, spiunazhin dhe nxitjen e tensioneve.

Duke folur për sigurinë në komunat veriore, ministri tha se mbyllja e strukturave ilegale që vepronin nga Serbia ka ndikuar në përmirësimin e gjendjes. Sipas tij, kjo u ka mundësuar forcave të KFOR-it të optimizojnë pozicionet dhe institucioneve të Kosovës të thellojnë integrimin me komunitetin serb, mbi bazën e trajtimit të barabartë të qytetarëve.

Konjufca përfundoi duke thënë se, tashmë që të gjitha institucionet janë konstituuar, Qeveria e Kosovës do të vijojë me agjendën për prosperitet socio-ekonomik, drejtësi dhe siguri.