KFOR-i: Stabiliteti i qëndrueshëm në Kosovë kërkon zgjidhje politike

KFOR-i njoftoi për vizitën në Kosovë të komandantit suprem të forcave aleate të NATO-s për Evropë (SACEUR), gjeneralit Alexus G. Grynkewich, i cili u prit nga komandanti i misionit, gjeneralmajor Roberto Vergori.

Gjatë vizitës u diskutua procesi i optimizimit të KFOR-it, i cili mbështetet në një vlerësim të përbashkët të përmirësimeve të vërejtura në situatën e sigurisë.

Sipas njoftimit, çdo ndryshim në numrin dhe përbërjen e trupave të KFOR-it do të kryhet gradualisht dhe me kujdes. Këto përshtatje do të bazohen në vlerësimet e vazhdueshme nga terreni dhe do të jenë të kthyeshme nëse shfaqen zhvillime të rëndësishme të sigurisë që mund të cenojnë sigurinë lokale apo stabilitetin rajonal.

Gjatë qëndrimit në Kosovë, gjenerali Grynkewich dhe gjeneralmajori Vergori zhvilluan takime me përfaqësues të rëndësishëm të institucioneve të Kosovës, si dhe me përfaqësues të Listës Serbe.

Këto takime përcollën sërish qëndrimin se siguria afatgjatë nuk mund të garantohet pa një zgjidhje politike, dialog gjithëpërfshirës dhe bashkëpunim.

Vizita e zyrtarëve të NATO-s përfundoi në Manastirin e Graçanicës, ku ata u takuan me përfaqësues fetarë.

KFOR-i theksoi se do të vazhdojë të jetë garantues i palëkundur i stabilitetit dhe të kontribuojë për një mjedis të sigurt e të qetë, si dhe për lirinë e lëvizjes së të gjithë njerëzve që jetojnë në Kosovë.

Misioni do ta përmbushë këtë rol në përputhje me mandatin e tij afatgjatë të Kombeve të Bashkuara, në çdo kohë dhe në mënyrë të paanshme.