Kërkesa për largimin e Abdixhikut ndez debat në LDK, partia përballë një momenti vendimtar?

Rezultati i dobët i Lidhjes Demokratike të Kosovës në zgjedhjet e fundit ka vënë në lëvizje zhvillime të reja brenda partisë, ku po flitet për ndryshime në krye të saj.

Burime nga LDK-ja kanë bërë të ditur se ka nisur mbledhja e nënshkrimeve për thirrjen e një kuvendi të jashtëzakonshëm, në të cilin pritet të vihet në shqyrtim edhe shkarkimi i kryetarit Lumir Abdixhiku.

Sipas informacioneve që qarkullojnë, nisma është ndërmarrë nga kryetari i Komunës së Pejës, Gazmend Muhaxheri.

Këto zhvillime të fundit kanë sjellë komente të ndryshme nga analistë dhe persona të afërt me LDK-në, të cilët po e interpretojnë situatën nga kënde të ndryshme.

Një pjesë e tyre e shohin kërkesën për ndërrim të udhëheqjes si rezultat të pakënaqësive të akumuluara pas humbjeve në zgjedhje dhe si një shans për reformim të partisë. Të tjerë nënvizojnë se çdo hap i tillë duhet të bëhet në pajtim me Statutin e LDK-së dhe se vendimi që del nga Kuvendi duhet të pranohet nga të gjitha palët.

Megjithatë, ende nuk dihet nëse kjo iniciativë do të arrijë të sigurojë përkrahjen e nevojshme apo nëse do të ndikojë në thellimin e përçarjeve të brendshme në partinë më të vjetër politike në Kosovë.

Qarri: Kërkesat e disa degëve për dorëheqjen e Lumir Abdixhikut dhe zgjedhje të brendshme lidhen me pakënaqësitë pas humbjeve zgjedhore

Analisti politik Gani Qarri, në një prononcim për “Bota sot”, është shprehur se pas humbjes së tretë me radhë të LDK-së në zgjedhjet parlamentare brenda 16 muajve, katër degë që ai i konsideron ndër më të suksesshmet dhe më të rëndësishmet e partisë kanë kërkuar publikisht largimin e parevokueshëm të kryetarit Lumir Abdixhiku.

“Menjëherë pas numërimit të votave dhe humbjes së tretë radhazi, degët e Pejës, Lipjanit, Dega e Dytë në Prishtinë dhe Rahoveci kërkuan dorëheqjen e Lumir Abdixhikut, duke e konsideruar atë përgjegjësin kryesor për rezultatin e dobët. Ato kërkuan edhe mbajtjen e zgjedhjeve të përgjithshme të brendshme si mënyrën e vetme për rimëkëmbjen e LDK-së”, u shpreh Qarri për ‘Bota sot’.

Sipas tij, pakënaqësia në parti nuk ka mbetur vetëm te reagimet publike.

“Frika se LDK mund të margjinalizohet nëse nuk ndryshon lidershipi ka bërë që të nisë edhe mbledhja e nënshkrimeve për dorëheqjen e Abdixhikut, thirrjen e një kuvendi të jashtëzakonshëm dhe organizimin e zgjedhjeve të përgjithshme të brendshme, nga niveli i nëndegëve deri te zgjedhja e kryetarit të ri”, tha ai.

Qarri ka kritikuar edhe mënyrën se si Abdixhiku iu përgjigj kërkesave të degëve.

“Në vend që të japë dorëheqje ose të reflektojë, Abdixhiku ka kërkuar dorëheqjen e kryetarëve të degëve në Pejë dhe Lipjan, duke i quajtur sabotatorë vetëm pse kërkuan përgjegjësi pas rezultatit të zgjedhjeve. Kjo dëshmon se LDK po kalon një krizë shumë të thellë të brendshme, e cila mund të rrezikojë të ardhmen politike të partisë”, deklaroi Qarri.

Ai tha po ashtu se nisma për mbledhjen e nënshkrimeve, që sipas tij është nisur nga Gazmend Muhaxheri, mund të marrë përkrahje të gjerë.

“Duke parë pakënaqësinë në rritje ndaj kryetarit aktual, kjo nismë pritet të jetë e suksesshme. Në të kundërtën, ekziston rreziku i krijimit të grupeve kundërshtare brenda partisë, përçarjes së saj dhe madje edhe formimit të fraksioneve të reja politike”, u shpreh ai.

Në përmbyllje, Qarri vlerësoi se ecuria zgjedhore e LDK-së nën drejtimin e Abdixhikut përbën bazë të mjaftueshme për të kërkuar përgjegjësi.

“Është fakt se LDK, edhe në komuna ku dikur qeveriste, ka rënë në renditje. Prandaj, Abdixhikut i kërkohet llogaridhënie dhe shqyrtim serioz i kërkesës së degëve për dorëheqje. Nëse kjo nuk ndodh, ekziston rreziku që partia të përballet me pasoja edhe më të rënda politike”, përfundoi Qarri.

Saim Tahiraj: Çdo nismë për ndryshime në LDK duhet të trajtohet sipas statutit

Nga ana tjetër, ish-veprimtari i LDK-së, Saim Tahiraj, ka thënë se çdo iniciativë e ndërmarrë në përputhje me Statutin e Lidhjes Demokratike të Kosovës duhet parë si legjitime dhe demokratike.

“Nëse kjo nismë është e vërtetë, nuk shoh asgjë për t’u shqetësuar. Çdo iniciativë që respekton normat statutare të LDK-së është plotësisht demokratike. Nëse sigurohen nënshkrimet e nevojshme, atëherë çështja i kalon Kuvendit të LDK-së, i cili vendos nëse kryetari Lumir Abdixhiku duhet të vazhdojë mandatin apo të largohet. Çfarëdo vendimi që merr Kuvendi duhet të respektohet nga të gjithë”, tha Tahiraj për ‘Bota sot’.

Ai shtoi se, në rast se nisma nuk arrin të sigurojë numrin e kërkuar të nënshkrimeve sipas Statutit, atëherë kryetari aktual duhet të vijojë mandatin dhe ky vendim duhet të pranohet nga të gjitha strukturat e partisë.

Duke folur për rezultatin zgjedhor të LDK-së, Tahiraj u shpreh se ai ka qenë më i ulët se pritjet e partisë.

“Nëse bëhet një analizë e mirëfilltë e zgjedhjeve të fundit, rezultati është shumë i dobët krahasuar me ambiciet e LDK-së. Për këtë duhet të ketë përgjegjësi dhe llogaridhënie, duke filluar nga kryetari i partisë e deri te drejtuesit e degëve dhe nëndegëve. Deri më tani nuk është bërë një analizë serioze dhe askush nuk ka dhënë përgjegjësi për këto rezultate”, u shpreh ai.

Sipas Tahirajt, LDK-ja është larguar nga identiteti i saj tradicional.

“E kam thënë vazhdimisht dhe vazhdoj ta them se LDK ka dalë nga shtrati i saj tradicional dhe nuk është më vetvetja. Vetëm duke iu rikthyer identitetit të saj të vërtetë mund ta rifillojë rrugëtimin drejt suksesit“, deklaroi ai.

Ai kërkoi që partia të bëjë një analizë të thelluar të gjendjes dhe më pas, mbi atë bazë, të ndërmarrë reforma.

“Mendoj se zgjidhja më e mirë është një analizë e thellë, e cila do të evidentojë gabimet dhe do t’u japë mundësi përgjegjësve të reflektojnë pa inate. Pas kësaj do të ishte shumë e shëndetshme të mbaheshin zgjedhje në të gjitha nivelet e partisë, në përputhje me traditën dhe parimet mbi të cilat është ndërtuar LDK-ja”, tha Tahiraj.

Mes tjerash, ai theksoi se sipas bindjes së tij, rikthimi i LDK-së në rrugën e suksesit mund të vijë vetëm përmes ruajtjes së identitetit të saj politik.

“Vetëm origjinaliteti i vërtetë i LDK-së është rruga drejt suksesit, e jo improvizimet dhe modelet e huazuara që, sipas meje, e kanë dëmtuar partinë nga brenda”, u shpreh ai.

Saim Tahiraj ka bërë edhe një deklaratë të fortë politike për zhvillimet dhe gjendjen e brendshme në Lidhjen Demokratike të Kosovës, duke pretenduar se partia po përballet me ndikime dhe prirje ideologjike nga jashtë.

“LDK, që nga anëtari më i thjeshtë e deri te kryetari, duhet ta kuptojë mirë se ideologjia komuniste pansllaviste ka vepruar vazhdimisht në hapësirën shqiptare. Sipas meje, kjo ideologji është përcjellë përmes LPK-së dhe sot vazhdon të jetë e shpërndarë në parti si PDK, AAK dhe subjekte të tjera më të vogla, me qëllim shkatërrimin e LDK-së”, ka deklaruar Tahiraj.

“Nuk duhet të harrojmë se disa elementë të tillë janë infiltruar edhe brenda partisë. Ka një vazhdimësi të strukturave ideologjike që kanë funksionuar që nga e kaluara, dhe kjo po reflektohet edhe sot në politikën shqiptare”, ka thënë ai.

Në fund, ai theksoi se LDK mbetet, sipas tij, e vetmja forcë politike origjinale në vend.

“Unë besoj se LDK është e vetmja parti origjinale nacionaliste dhe demokratike në Kosovë. Të gjitha forcat e mirëfillta nacionaliste duhet të rreshtohen pranë saj, sepse pa LDK-në rrezikohet edhe vetë stabiliteti politik i vendit.

Sipas bindjes sime, të gjitha forcat e mirëfillta të djathta nacionaliste duhet të rreshtohen krah LDK-së, sepse e konsideroj atë forcën e vetme politike origjinale të këtij orientimi në Kosovë”, përfundoi Tahiraj për “Bota sot”.