Jo!” – Avdullah Hoti kundërshton kandidaturën e Bekim Sejdiut për President

Deputeti i LDK-së, Avdullah Hoti, ka bërë të ditur se nuk do ta mbështesë kandidaturën e propozuar për President të Republikës së Kosovës.

Sipas Hotit, qëndrimi i tij nuk buron nga ndonjë arsye personale, por nga bindje politike dhe institucionale. Ai theksoi se Presidenti duhet të jetë një figurë që bashkon qytetarët, krijon konsensus përtej partive dhe mbron interesin e përgjithshëm.

Hoti vlerësoi se kandidatura në fjalë nuk përputhet me parimet dhe interesat e Lidhjes Demokratike të Kosovës dhe të elektoratit të saj. Për këtë arsye, ai kërkoi që LDK-ja të mbajë një qëndrim të qartë, të pavarur dhe të përgjegjshëm.

“Nuk mund të mbështesim një kandidaturë vetëm për hir të një marrëveshjeje politike”, shkroi Hoti.

Ai publikoi edhe qëndrimin e tij të plotë:

Nuk e përkrah këtë kandidaturë për President të Republikës së Kosovës, jo për arsye personale, por për një parim politik dhe institucional.

Presidenti i Republikës duhet të jetë një figurë unifikuese, e aftë të ndërtojë konsensus përtej interesave partiake dhe të përfaqësojë interesin e përgjithshëm të qytetarëve. Në vlerësimin tim, kjo kandidaturë nuk e plotëson këtë kriter.

Po ashtu, kjo kandidaturë nuk pasqyron interesat politike dhe parimore të Lidhjes Demokratike të Kosovës dhe të elektoratit të saj. Përkundrazi, mënyra e imponimit të kësaj zgjidhjeje krijon përshtypjen se LDK-ja ka penguar kandidatura të tjera politike vetëm për t’i hapur rrugë një kandidature që, në thelb, është gjithashtu politike.

LDK-ja duhet të mbajë një qëndrim të qartë, të pavarur dhe të përgjegjshëm. Nuk mund të mbështesim një kandidaturë vetëm për hir të një marrëveshjeje politike, nëse ajo nuk përfaqëson parimet, interesat dhe pritjet e elektoratit të LDK-së.

Kjo nuk është çështje individësh, por e parimeve, identitetit politik dhe përgjegjësisë që kemi ndaj votuesve tanë.

Zoti e bekoftë Lidhjen Demokratike të Kosovës!