IPK kërkon pezullimin e policit të dyshuar për përvetësimin e 105 eurove në Aeroport

Inspektorati Policor i Kosovës ka nisur një hetim ndaj një zyrtari policor, i cili dyshohet se ka shkelur procedurat ligjore pasi mori në dorëzim 105 euro të gjetura në Aeroportin Ndërkombëtar të Prishtinës “Adem Jashari”.

Rasti është regjistruar nga IPK-ja më 14 shtator 2026, pas referimit të bërë nga Policia e Kosovës. Në qendër të hetimit ndodhet një zyrtar që shërben në Stacionin Policor Kufitar në aeroport.

Hetimet fillestare kanë treguar se më 9 shtator një punonjës i aeroportit kishte raportuar humbjen e shumës prej 105 eurosh. Pas verifikimit të pamjeve të kamerave të sigurisë, është vërtetuar se paratë i kishte gjetur një udhëtare, shtetase e Kosovës që jeton në Gjermani.

Udhëtarja ia kishte dorëzuar shumën një zyrtari policor, bëri të ditur IPK-ja, transmeton Klankosova.tv.

Gjatë marrjes në pyetje, zyrtari ka pohuar se i kishte pranuar paratë, por nuk i kishte dorëzuar apo administruar ato sipas rregullave ligjore dhe procedurave institucionale që zbatohen në raste të tilla.

Dokumentet e rastit tregojnë se, më pas, shuma ishte vendosur në kutinë e donacioneve të një organizate bamirëse në Aeroport.

Me arsyetimin se ka dyshim të arsyeshëm dhe se masa do të ndihmonte në mbarëvajtjen e hetimeve, IPK-ja i ka rekomanduar Policisë së Kosovës suspendimin me pagesë të zyrtarit.

Hetimi po zhvillohet nën dyshimet për kryerjen e veprave penale “Përvetësimi në Detyrë” dhe “Shpërdorimi i Pasurisë së Huaj”.