I dyshuari për krime lufte në Zubin Potok ndalohet me urdhër të Prokurorisë Speciale

Të enjten, hetuesit e Drejtorisë për Hetimin e Krimeve të Luftës kanë vënë në pranga një person, me autorizim të Prokurorisë Speciale të Republikës së Kosovës, në kuadër të hetimeve të vazhdueshme për ngjarjet në Zubin Potok.

I arrestuari, i identifikuar si R.K., dyshohet se ka kryer veprën penale “Krime lufte kundër popullsisë civile” dhe ndaj tij është shqiptuar masa e ndalimit prej 48 orësh.

Sipas njoftimit zyrtar, Prokuroria Speciale do t’i drejtohet Gjykatës Themelore në Prishtinë me kërkesë për caktimin e paraburgimit brenda afatit të paraparë nga Kodi i Procedurës Penale, ndërsa veprimet e mëtejshme hetimore do të zhvillohen në bashkëpunim me autoritetet policore.

Prokuroria Speciale dhe Policia e Kosovës kanë ritheksuar përkushtimin e tyre për të hetuar dhe proceduar penalisht të gjithë personat e dyshuar për krime të kryera gjatë konfliktit në Kosovë.