Hoxhaj: Integrimi i Kosovës në NATO dhe BE, kundërpërgjigje ndaj zgjerimit të ndikimit kinez në Ballkan

Ish-ministri i Jashtëm i Kosovës, Enver Hoxhaj, ka deklaruar se anëtarësimi i vendit në NATO dhe Bashkimin Evropian, si dhe avancimi i integrimit euroatlantik të të gjithë rajonit, duhet të konsiderohen një reagim strategjik ndaj ndikimit gjithnjë e më të madh të Kinës në Ballkan.

Gjatë fjalimit të mbajtur në Samitin e IPAC-ut në Hagë, ku ishte i pranishëm si anëtar i Aleancës Ndërparlamentare për Kinën, Hoxhaj tha se angazhimi i Pekinit në fushat ekonomike, ushtarake dhe teknologjike dëshmon për ambiciet e tij gjeopolitike në këtë pjesë të Evropës. Videoja e fjalimit u publikua prej tij së bashku me një postim.

“Kosova dhe Ballkani nuk mund të mbeten pafundësisht në paradhomën e Evropës!”, shkroi Hoxhaj.

Ai vlerësoi se pritshmëritë që rritja e pranisë kineze, veçanërisht agresioni rus në Ukrainë, do ta shtynin Evropën drejt një zgjimi gjeopolitik nuk janë realizuar ende. Sipas Hoxhajt, në vend që zgjerimi të shërbente si një forcë e re për Evropën, rajoni ka mbetur në një situatë të karakterizuar nga status quo-ja dhe ngecja.

Hoxhaj nënvizoi se përfshirja e Kosovës në NATO dhe BE, krahas orientimit euroatlantik të vendeve të tjera të Ballkanit, përbën mënyrën më efektive për t’iu kundërvënë shtrirjes së ndikimit kinez nga rajoni drejt Evropës.

Ai bëri thirrje që zgjerimi të shihet si një nismë me rëndësi gjeopolitike, e lidhur ngushtë me sigurinë dhe perspektivën e ardhshme të vetë Evropës.