Hoti shpreh dyshime për efektin e ndryshimeve në Ligjin për Dhomat e Specializuara

Ministri Andin Hoti ka thënë se nuk është plotësisht i bindur që ndryshimet në Ligjin për Dhomat e Specializuara të Kosovës do të garantojnë mbrojtjen e nevojshme për personat që po gjykohen në Hagë. Ai i ka konsideruar të pritshme reagimet e Bashkimit Evropian, duke qenë se hartimi i ndryshimeve nuk është paraprirë nga konsultimet me BE-në.

Duke folur në një konferencë për media pas mbledhjes së Qeverisë, Hoti deklaroi se kundërshtimet e BE-së lidheshin pikërisht me kërkesën për konsultim paraprak lidhur me ndërhyrjet në ligj.

Ligji për Dhomat e Specializuara u votua javën e kaluar në Kuvendin e Republikës së Kosovës, ndërsa Hoti tha se edhe kryeministri Kurti kishte shprehur më herët pasiguri për ndikimin e këtyre ndryshimeve.

“Sa i përket reagimit të Bashkimit Evropian, i keni parë reagimet e tij, në të cilat këto ndryshime në Ligjin për Dhomat e Specializuara janë cilësuar si të papranueshme. Ligji u votua javën e kaluar në Kuvendin e Republikës së Kosovës. Siç mund të flas tani në emër të Qeverisë, nëse flas në emrin tim, do të citoja një fjali të kryeministrit Kurti, të thënë ditën kur u votuan ndryshimet për Dhomat e Specializuara. Kryeministri Kurti e ka theksuar shumë mirë se nuk jemi shumë të bindur për këtë. Megjithatë, besoj se partia që i ka hartuar ndryshimet është konsultuar me akterë të tjerë dhe me Apelin. Sa i përket kësaj çështjeje, do të shohim se çfarë strategjie do të ndiqet. Por, edhe unë personalisht, si Andin, nuk jam shumë i bindur se këto ndryshime do të sjellin rezultatet e nevojshme për të siguruar një mbrojtje të duhur. Po theksoj se kjo është çështje që u përket atyre që sot ndodhen në Hagë”, tha Hoti.

Ministri sqaroi se reagimi i BE-së lidhet edhe me mënyrën se si janë përgatitur ndryshimet ligjore. Sipas tij, në këtë proces parashihet që konsultimi me Bashkimin Evropian të zhvillohet paraprakisht.

Ndërkohë, Qeveria e Kosovës ka marrë vendim për krijimin e një grupi punues, i cili do të hartojë një strategji shtetërore për procedurat e Apelit në rastin e katërshes së UÇK-së.

Hoti bëri të ditur se drejtimin e këtij grupi do ta marrë zëvendëskryeministri dhe ministri i Punëve të Jashtme, Glauk Konjufca.

Ai tha se aktualisht nuk mund të përcaktohet një datë për përfundimin e strategjisë, pasi përgatitja e saj varet nga disa faktorë. Megjithatë, puna duhet të nisë pa vonesë dhe të zhvillohet me kujdes.

Sipas Hotit, hartimi i strategjisë kërkon vëmendje të veçantë, në mënyrë që nxitimi të mos sjellë gabime gjatë këtij procesi.