Hoti dhe Murati përplasen për Prishtina 2030: Kush mban përgjegjësinë për Lojërat Mesdhetare?

Organizimi i Lojërave Mesdhetare Prishtina 2030 u kthye në temë debati mes deputetit të Lidhjes Demokratike të Kosovës (LDK), Avdullah Hoti, dhe ministrit të Financave, Hekuran Murati, gjatë mbledhjes së Komisionit për Buxhet.

Hoti e akuzoi Qeverinë se nuk po merr përgjegjësinë e duhur për përgatitjen e kësaj ngjarjeje sportive. Ai kërkoi që ekzekutivi të sigurojë financimin e plotë për projektet e nevojshme, në rast se Komuna e Prishtinës nuk arrin t’i përfundojë ato, ndërsa aktivitetet parashikohet të zhvillohen edhe në komuna të tjera.

Hoti kërkon që Qeveria të marrë përsipër organizimin

“Për Lojërat Olimpike (Mesdhetare), me Komunën e Prishtinës “kërrsh” jeni bërë duke u shtyrë njëri me tjetrin. Duhet të marrësh pronësi, ti qeveri je. T’i të marrësh pronësi për të gjitha ato, për krejt buxhetin që duhet për Lojërat Olimpike edhe t’i inkuadrosh ti në buxhet nëse Komuna e Prishtinës nuk e bën, edhe komunat tjera sepse do të shpërndahen gjithandej, duhet të marrësh pronësi. Në 2030-tën do të ndodhin, më 2027 ose 2028 do të duhej të përfundonin plotësisht”, theksoi Hoti.

Ministri Hekuran Murati tha se fondet për Lojërat Mesdhetare janë përfshirë në buxhetin e Ministrisë së Sportit. Sipas tij, megjithatë, ende nuk janë përcaktuar të gjitha lokacionet ku do të zhvillohen sportet dhe ku pritet të ndërtohen objektet sportive.

Murati: Fondet janë planifikuar në buxhetin e Ministrisë së Sportit

“Tek çështja e Lojërave Mesdhetare, edhe këtu kemi situatën e ngjajshme meqenëse ende nuk ka saktësim të lokacioneve për të gjitha sportet ku parashihet të ketë ndërtim. Ideja ka qenë që të ketë një grumbullim dhe në momentin që ka qartësim, Ministria e Sportit mund të vazhdojë me zbatimin e projektit por buxhetimi, pra jemi munduar që ta akomodojmë të gjithë shumën në buxhet të Ministrisë së Sportit”, deklaroi Murati.

Përplasja mes tyre ndodh ndërsa vijojnë përgatitjet për Lojërat Mesdhetare Prishtina 2030. Realizimi i këtij organizimi kërkon bashkërendim mes institucioneve dhe përfundimin në kohë të projekteve infrastrukturore.