Hekuran Murati njofton nisjen e pagesave prej 100 eurosh për studentët

Ka filluar sot shpërndarja e pagesave shtesë për studentët, në kuadër të Pakos për Përballje me Inflacionin 2.0.

Njoftimi është bërë nga ministri i Financave, Punës dhe Transfereve, Hekuran Murati, përmes një postimi në Facebook.

Murati ka sqaruar se ky hap është përmbyllur pasi komisioni verifikues ka marrë dhe ka shqyrtuar të gjitha të dhënat e nevojshme nga institucionet e arsimit të lartë.

“Pas pranimit të verifikimeve të nevojshme nga institucionet e arsimit të lartë, komisioni verifikues sot ka finalizuar dhe dorëzuar listën e studentëve që janë kualifikuar për mbështetjen e njëhershme me 100 euro”, ka shkruar Murati.

Studentët që kanë plotësuar kriteret dhe kanë kaluar procesin e verifikimit, do ta marrin mbështetjen e njëhershme prej 100 eurosh drejtpërdrejt në llogaritë e tyre bankare.