Haziri: Vetëm bashkëpunimi politik dhe institucional mund ta nxjerrë vendin nga kriza

Nënkryetari i Lidhjes Demokratike të Kosovës, Lutfi Haziri, ka kërkuar koordinim mes partive dhe institucioneve, duke vlerësuar se vetëm një dakordim gjithëpërfshirës për krijimin e institucioneve mund t’i japë fund krizës politike dhe ta rikthejë stabilitetin në vend.

Përmes një postimi në Facebook, ai u shpreh se Kosovës i duhet një agjendë e qartë politike, ndërsa vendi ndodhet në fund të javës së dytë pas zgjedhjeve të 7 qershorit.

“Bashkëpunimi partiak e institucional është udha e vetme për ta thyer rrethin vicioz që po e lodh Republikën! Kosova sot ka nevojë për agjendë të zbardhur kur jemi në fund të javës së dytë pas zgjedhjeve të 7 qershorit. Cilido opsion që arrin marrëveshjen gjithëpërfshirëse, programin zhvillimor dhe agjendën strategjike duhet ta ketë në qendër të saj, ndërkaq skenari i ndarjes së përgjegjësive institucionale vjen në fund. Bashkëpunimi partiak e institucional është udha e vetme për ta thyer rrethin vicioz, për t’i dhënë fund krizave politike, që nënkupton kthimin e stabilitetit”, shkroi ai.

Haziri nënvizoi gjithashtu se pozicioni i Kosovës si faktor stabiliteti në rajon lidhet drejtpërdrejt me qëndrueshmërinë politike të brendshme dhe me bashkëpunimin ndërmjet subjekteve politike në vend.

“Kemi premtuar që Republika e Kosovës është faktor i stabilitetit rajonal, duke respektuar vlerat demokratike. Ky rol i stabilitet rajonal buron nga stabiliteti dhe bashkëpunimi brenda Kosovës. Republika e Kosovës i ‘duron’ zgjedhjet e shpeshta vetëm kur e kujton që mundet me mbet edhe pa zgjedhje një ditë. Një njeri dhe një parti është kauzë e humbur më 17 shkurt! Republika, mbi të gjithë!”, shkroi ai.