Haxhiu kritikon vonesën e subvencionimit të teksteve shkollore: Dështim dhe papërgjegjësi e Qeverisë

Deputetja e Aleancës, Teuta Haxhiu, ka akuzuar Qeverinë për zvarritje të procesit të subvencionimit të teksteve shkollore, ndërsa fillimi i vitit të ri shkollor është vetëm pak ditë larg.

Sipas Haxhiut, kjo situatë dëshmon neglizhencë dhe mungesë përgjegjësie nga pushteti, me theks të veçantë ndaj ministrit Hajrullah Çeku, i cili aktualisht është deputet.

“Kjo konferencë është thirrur për të denoncuar neglizhencën dhe papërgjegjësinë e pushtetit, veçanërisht të ministrit Çeku, përkatësisht deputetit Çeku, i cili nuk ka përmbushur detyrimet e përcaktuara me Ligjin për Arsimin Parauniversitar dhe me Udhëzimin Administrativ 13/2026 për subvencionimin e teksteve mësimore për nxënësit e Kosovës”, deklaroi ajo.

Haxhiu theksoi se nxënësit duhej ta nisnin vitin shkollor të përgatitur në çdo nivel. Ajo e cilësoi miratimin e katalogut më 27 gusht si një vendim të vonuar, që ka shtuar presionin mbi prindërit, të cilët kanë pritur që fëmijët e tyre të pajisen me tekste në kohë.

Deputetja tha se Ministria e Arsimit ka pasur një kalendar të përcaktuar për procedurat. Sipas saj, në muajin qershor duhej të krijohej komisioni për negocimin e çmimeve me shtëpitë botuese, ndërsa katalogu më pas duhej t’u dërgohej drejtorive komunale dhe prej tyre shkollave. Haxhiu kujtoi se drejtoritë komunale duhej t’i dorëzonin raportet përfundimtare në ministri deri më 15 korrik.

“Afati i fundit për përgatitjen dhe dërgimin e raporteve nga drejtoritë komunale ka qenë 15 korriku. Duke parë kohën nga 15 korriku deri më 27 gusht, kuptohet qartë se ka pasur hapësirë të mjaftueshme për përgatitje. Mosveprimi nuk mund të shpjegohet ndryshe veçse si papërgjegjësi totale. Për gjashtë vjet, këta njerëz e kanë ushtruar detyrën sikur të ishin praktikantë dhe po vazhdojnë të veprojnë në të njëjtën mënyrë”, u shpreh Haxhiu.