Gjykimi për vrasjen në Aktash vazhdon në mungesë të Endrit Llapashticës dhe Dardan Marevcit

Gjykata Themelore në Prishtinë zhvilloi të martën shqyrtimin fillestar ndaj Endrit Llapashticës dhe Dardan Marevcit, të cilët akuzohen në lidhje me vrasjen e ndodhur në Aktash. Duke qenë se të dy vazhdojnë të jenë të paarritshëm për organet e drejtësisë, procesi gjyqësor ndaj tyre po mbahet në mungesë.

Prokurori Bashkim Zeqa deklaroi në fillim se Prokuroria i ka ndërmarrë të gjithë hapat e nevojshëm për sigurimin e të pandehurve, por ata ndodhen në arrati që nga koha kur është kryer vepra penale. Ai tha se aktakuza është ngritur në mungesë në përputhje me dispozitat ligjore, pasi janë shterur të gjitha mundësitë ligjore për arrestimin dhe sigurimin e pranisë së tyre.

Sipas prokurorit Zeqaj, për gjetjen e të pandehurve janë përdorur të gjitha masat, përfshirë fletarrestin dhe fletërreshtimin vendor e ndërkombëtar. Megjithatë, ata vijojnë të jenë në arrati, ndonëse janë të vetëdijshëm se ndaj tyre është duke u zhvilluar procedurë penale.

Prokurori shtoi se të pandehurit po veprojnë në këtë mënyrë për t’iu shmangur thirrjeve të Prokurorisë dhe institucioneve të drejtësisë. Për këtë arsye, ai kërkoi që procesi ndaj tyre të vazhdojë në mungesë.

Yll Hasani, avokat i autorizuar i Dardan Marevcit, deklaroi se nuk e kundërshtonte propozimin e Prokurorisë. Ndërkaq, Muhamet Mehmeti, mbrojtës i autorizuar i Endrit Llapashticës, tha se vendimmarrjen ia linte në diskrecion Gjykatës.

Pas deklarimeve të palëve, kryetarja e trupit gjykues, Fatime Dermaku, mori vendim që shqyrtimi fillestar të vazhdonte. Palët u pajtuan gjithashtu që aktakuza të quhej e lexuar.

Gjyqtarja Dermaku e njoftoi mbrojtjen se brenda një afati prej 30 ditësh mund të parashtrojë kërkesë për hedhjen e aktakuzës dhe kundërshtimin e provave.

Në këtë çështje penale, Korab Gashi, Valdrin Ademi, Robert Llumnica, Salih Sekiraqa, Fatos Abazi, Erd Marevci, Endrit Llapashtica, Dardan Marevci dhe Vesel Bunjaku akuzohen në lidhje me vrasjen e Premtim Gashit, e ndodhur më 1 shtator 2024 në lagjen Aktash të Prishtinës, raporton “Betimi për Drejtësi”.

Prokuroria Themelore në Prishtinë e kishte ngritur më 12 shkurt 2026 aktakuzën ndaj nëntë personave: Korab Gashit, Valdrin Ademit, Robert Llumnicës, Salih Sekiraqës, Fatos Abazit, Erd Marevcit, Endrit Llapashticës, Dardan Marevcit dhe Vesel Bunjakut. Akuza lidhet me rastin në të cilin Premtim Gashi u vra më 1 shtator 2024, në lagjen Aktash në Prishtinë.

Sipas aktakuzës, ngjarja ka të bëjë me një përleshje me armë ndërmjet dy grupeve në lokalin “From”. Nga kjo përplasje mbeti i vrarë Premtim Gashi, ndërsa u plagosën edhe disa persona të tjerë. Të pandehurit ngarkohen me disa vepra penale, mes tyre “Vrasje të rëndë”, “Vrasje të rëndë në tentativë”, “Manipulim me prova” dhe “Mbajtje në pronësi, kontroll ose posedim të paautorizuar të armëve”.

Aktakuza e lidh motivin e sulmit me një konflikt të mëparshëm, të ndodhur më 4 mars 2024 ndërmjet Shkumbin Sekiraqës, djalit të Salih Sekiraqës, dhe Pajtim Gashit, vëllait të të ndjerit Premtim Gashi. Ky incident kishte sjellë përshkallëzimin e përplasjes mes dy grupeve.

Endrit Llapashtica akuzohet se, në bashkëkryerje, ka kryer veprën penale “Vrasje e rëndë”. Ai dhe Dardan Marevci ngarkohen gjithashtu me veprën penale “Mbajtja në pronësi, në kontroll ose posedim të paautorizuar të armëve”.

Në seancën e mbajtur më 6 maj 2026 në Gjykatën Themelore në Prishtinë, Korab Gashi, Valdrin Ademi dhe Erd Marevci u deklaruan të pafajshëm për “Vrasje në tentativë” dhe “Armëmbajtje pa leje”. Vesel Bunjaku mohoi fajësinë për “Armëmbajtje pa leje” dhe “Manipulim me prova”.

Robert Llumnica, Salih Sekiraqa dhe Fatos Abazi u deklaruan të pafajshëm për “Vrasje të rëndë”, por e pranuan fajësinë për “Armëmbajtje pa leje”. Në të njëjtën seancë, procedura ndaj Dardan Marevcit dhe Endrit Llapashticës u veçua për shkak se të dy gjendeshin në arrati. Në atë kohë, Gjykata kishte vlerësuar se nuk ishin përmbushur kushtet për zhvillimin e gjykimit të tyre në mungesë.